Իրավապաշտպանը պնդում է` ԱՄՆ-ն իր տասնամյակների ծրագիրն է ցանկանում իրականացնել՝ Ռուսաստանին դուրս մղելով տարածաշրջանից։
ԵՐԵՎԱՆ, 27 հուլիսի – Sputnik. TRIPP նախագիծն ուղղակի սահմանափակում է Հայաստանի Հանրապետության շփումներն Իրանի հետ և կտրում Ռուսաստանից։ Sputnik Արմենիա մուլտիմեդիոն մամուլի կենտրոնում ասուլիսի ժամանակ այս տեսակետը հայտնեց իրավապաշտպան Լարիսա Ալավերդյանը։
Նա նշեց՝ ամերիկացի քաղաքագետ, սոցիոլոգ և պետական գործիչ Զբիգնև Բժեզինսկին դեռևս 30 տարի առաջ Հարավային Կովկասը համեմատել է Բալկանների հետ: Նա կարծում էր, որ ԱՄՆ-ն պետք է գերիշխի այս տարածաշրջանում՝ խնդիր դնելով Ռուսաստանին դուրս մղել այստեղից։ Ուստի ԱՄՆ-ն, ըստ Ալավերդյանի, իր տասնամյակների ծրագիրն է ցանկանում իրականացնել։
«Եթե մարդիկ կասկածում են, պարզապես թող քարտեզին նայեն»,- ասաց նա։
Քաղաքագետ Միհրան Շահզադեյանը հավելեց՝ քանի դեռ նախագծի իրավական կարգավորումները պարզ չեն, ապա դա լուրջ մտահոգություններ է առաջացնում Իրանի և Ռուսաստանի համար։
«Ալիևն ասում է «Զանգեզուրի միջանցք», ինչո՞ւ չի օգտագործում «Թրամփի ուղի» եզրույթը․ սա լուրջ հարված է Հայաստանի համար, Ադրբեջանը ստանալու է վերահսկողության շատ ուժեղ լծակներ»,- նշեց քաղաքագետը։
Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը 2025 թվականի օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան:
Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։
ՀՀ վարչապետ Նիկոլ Փաշինյանը սեպտեմբերի 11-ին հայտարարեց, որ ՀՀ–ն ոչ թե 99 տարով հողը վարձակալության է տալիս ամերիկյան կողմին, այլ տալիս է կառուցապատման իրավունք։
Leave a Reply