«Մինչև 200 հազար դրամ աշխատավարձ ստացող մեր քաղաքացիները ևս 2027 թվականի հունվարի 1-ից կընդգրկվեն առողջության համընդհանուր ապահովագրության համակարգում»:
Այս մասին որոշումն ընդունվել է ՀՀ կառավարության հոկտեմբերի 29-ի նիստում:
«Նրանց համավճարի բեռը կբաշխվի հետևյալ համամասնությամբ. 10 հազար 800 ամսական ապահովագրավճարից 4400 դրամը կսուբսիդավորի պետությունը, 4400 դրամը կվճարի գործատուն, և 2000 դրամն աշխատողը կվճարի»,- ներկայացրել է նախարարը:
Այն քաղաքացիները, որոնց աշխատավարձը 2027 թվականի հունվարի 1-ից անցնի 200 հազար դրամը և լինի մինչև 500 հազար դրամ, պետությունն այս պարագայում կսուբսիդավորի 6000 դրամ, մնացած 4400 դրամը կվճարի քաղաքացին»,- ասել է Անահիտ Ավանեսյանը։
Նախարարը նաև ներկայացրել է, որ 2027-ի հունվարի 1-ից աշխատող անձինք կամավոր հիմունքներով հնարավորություն կունենան ապահովագրել իրենց փոխկապակցված անձանց:
«Սա նշանակում է, որ 200 հազարից 500 հազար դրամ աշխատավարձ ստացողները կկարողանան իրենց ընտանիքից մեկ անդամի ևս ներառել համակարգ՝ իրենք վճարելով նրանց համար, իսկ 500 հազարից ավելի աշխատավարձ ստացողները՝ 2 անդամի»,- մանրամասնել է Ավանեսյանը:
Առողջության համընդհանուր ապահովագրության համակարգը Հայաստանում մեկնարկել է այս տարվա հունվարի 1-ից։
Առաջին փուլում ընդգրկվել են մինչև 18 տարեկան երեխաները, 65 և ավելի բարձր տարիքի քաղաքացիները, 18-65 տարեկան հաշմանդամության կարգ և սոցիալական անապահովության բալ ունեցող անձինք, ինչպես նաև 200 հազար դրամից ավելի աշխատավարձ ստացող քաղաքացիները։
Leave a Reply