«Գործակալների մասին խոսելիս՝ ինքը պետք է շատ ուշադիր լինի». Նարեկ Կարապետյանը՝ Փաշինյանին

15:31 – 26/հոկտեմբերի/2026

ՏԻՄ ընտրություններում «Ուժեղ Հայաստանը» մասնակցում էր միայն մեկ համայնքում, և այնտեղ, որտեղ մենք մասնակցել ենք, «Քաղաքացիական պայմանագիր» կուսակցությունը ռեկորդային ցածր տոկոս է հավաքել։ Այս մասին Facebook—ի իր էջում հայտարարել է «Ուժեղ Հայաստան» խմբակցության ղեկավար Նարեկ Կարապետյանը։

«Այդ համայնքում ՔՊ–ն գրավել է ընդամենը երկրորդ տեղը և չի կարողացել հասնել հաղթանակի։ Բացի դրանից, նա հիմա ստիպված է բանակցություններ վարել, որպեսզի իրեն կոալիցիոն ինչ-որ տեղակալի տեղ տան։

Սա ցույց է տալիս, որ «Ուժեղ Հայաստանը որտեղ կա, այնտեղ «Քաղաքացիական պայմանագրի» թևերը, հնարավորությունները կտրվում են։ Բայց միևնույն ժամանակ ինձ նաև մտահոգում է մյուս տարածաշրջաններում տեղի ունեցող վիճակը։ Որտեղ չկա «Ուժեղ Հայաստանը», այնտեղ ՔՊ–ն լիակատար դոմինացիա է կարողանում ստանալ՝ ճնշումների արդյունքում։

Միակ ուժը, որ կարողանում է էֆեկտիվ պայքարել հողի վրա, կարողանում է կազմակերպել այդ պայքարը, այս պահին քաղաքական դաշտում ես համարում եմ, որ մնացել է «Ուժեղ Հայաստանը», և մեր աշխատանքից է կախված, թե ինչքան ենք մենք սահմանափակելու հնարավորությունները, կտրելու թևերը»,–ասաց նա։

Անդրադառնալով վարչապետ Նիկոլ Փաշինյանի այսօրվա ֆեյսբուքյան «լայվին», որտեղ վերջինս հայտարարել էր, թե ՔՊ–ն գործակալական ուժերին է հաղթել, Նարեկ Կարապետյանն ասաց. ««Կարծում եմ, որ գործակալների մասին խոսելուց ինքը պետք է շատ ուշադիր լինի»։