Գյումրին սովորական քաղաք չէ․ Վարդան Ղուկասյանի տոնական ուղերձը

Գյումրու քաղաքապետ Վարդան Ղուկասյանը գյումրեցիներին շնորհավորել է քաղաքի օրվա առթիվ։

Ուղերձում Ղուկասյանը նշել է․ «Սիրելի՛ գյումրեցիներ, աշխարհասփյուռ հայրենակիցներ․

​Ի սրտե, ամենաջերմ ու ազնիվ զգացմունքներով շնորհավորում եմ բոլորիս մեր սիրելի, մեր պաշտելի քաղաքի՝ Գյումրու տոնի առթիվ։

Գյումրին սովորական քաղաք չէ․ այն մեր ազգային դիմագիծն է, մեր մշակութային ողնաշարն ու հոգևոր ամրոցը։

​Այս քաղաքի ամեն մի քարը, ամեն մի սև քարե շենքն ու կամարը պատմում են մեր ժողովրդի տաղանդի, արհեստի, պատվախնդրության ու անկոտրում ոգու մասին։ Գյումրին դիմակայել է դարերի փորձություններին, վերապրել է դժվարագույն արհավիրքներ, բայց երբեք չի կոտրվել, չի կորցրել իրեն բնորոշ ջերմությունը, լավատեսությունը, յուրահատուկ հումորն ու հյուրասիրությունը։

​Այսօր մեր մեծագույն պարտքն է ոչ միայն հպարտանալ Գյումրու հարուստ պատմությամբ ու մեծանուն զավակներով, այլև ամենօրյա քրտնաջան ու նվիրված աշխատանքով շենացնել մեր հայրենի տունը։ Գյումրին պետք է շարունակի ապրել, զարգանալ, ծաղկել և իր հյուրընկալ դռները բացել աշխարհի առջև՝ պահպանելով իր ավանդական ու անկրկնելի ոգին։

​Սիրելի՛ համաքաղաքացիներ,

Շնորհակալ եմ յուրաքանչյուրիդ՝ ձեր աշխատանքի, ձեր սրտացավության և մեր քաղաքի հանդեպ ունեցած անսահման սիրո համար։

​Թող Աստծո աջն ու օրհնությունը միշտ լինեն մեր քաղաքի, մեր օջախների և մեր ընտանիքների վրա։ Թող մեր քաղաքում միշտ հնչի մանկան ծիծաղը, թող թագավորեն խաղաղությունն ու համերաշխությունը։

​Շնորհավո՛ր տոնդ, հավերժական ու անպարտ իմ Գյումրի»։