Հայաստանը փոխակերպվել է ելքի ուղղությունից դեպի մուտքի և տարանցիկ ուղղության․ ՆԳ նախարար

Հայաստանը փոխակերպվել է ելքի ուղղությունից դեպի մուտքի և տարանցիկ ուղղության․ ՆԳ նախարար (ՏԵՍԱՆՅՈՒԹ)

Հոկտեմբերի 10-ին ՆԳ նախարար Արփինե Սարգսյանի գլխավորությամբ քննարկվել են Հայաստանի միգրացիայի և քաղաքացիության ոլորտների ռազմավարական ծրագրի հիմնական ուղղությունները։

Նախարարն ընդգծել է, որ միգրացիոն հոսքերի էական փոփոխությունները պահանջում են կառավարման նոր մոտեցումներ և արդյունավետ մեխանիզմներ։ Հայաստանը ելքի երկրից վերածվել է մուտքի և տարանցիկ ուղղության․ 2025 թվականին անկախությունից ի վեր առաջին անգամ արձանագրվել է ՀՀ քաղաքացիների սահմանահատումների միգրացիոն դրական սալդո, իսկ դրական միտումը պահպանվել է նաև 2026 թվականի առաջին կիսամյակում։

Արփինե Սարգսյանն ընդգծել է միգրացիոն քաղաքականության ռազմավարական մոտեցումների հստակեցման և փաստաթուղթը մինչև տարեվերջ ընդունելու կարևորությունը։ Անդրադարձ է կատարվել նաև քաղաքացիության ինստիտուտի վերարժևորմանը․ այս ուղղությամբ ծավալուն քննարկումների արդյունքում արդեն իսկ մշակվել է օրենսդրական նախաձեռնություն, որը գտնվում է ակտիվ քննարկման փուլում։ Կարևորվել է նաև վիզային քաղաքականության ինստիտուցիոնալացման անհրաժեշտությունը։

Հայաստանի միգրացիոն քաղաքականության ռազմավարական ծրագրի թիմի ղեկավար Տիգրան Ջրբաշյանը ներկայացրել է ռազմավարության մշակման ընթացքը՝ ընդգծելով ՆԳՆ-ի, շահագրգիռ պետական մարմինների և միջազգային գործընկերների համագործակցության կարևորությունը։ Նրա խոսքով՝ ռազմավարությունը համապետական նշանակության փաստաթուղթ է, որի արդյունավետ իրականացումը պահանջում է համատեղ ջանքեր և միասնական մոտեցումներ։

Տեսանյութը՝ https://www.youtube.com/watch?v=TsbuBISPJG8

Մանրամասները՝ https://mia.gov.am/2026/10/13/mia-165/