Պուտինը բացատրել է, թե ինչպես կարող են ԱՊՀ երկրները հասնել ավելի մեծ հաջողությունների

Ռուսաստանի նախագահ Վլադիմիր Պուտինը հայտարարել է, որ ԱՊՀ երկրները կարող են ավելի մեծ տնտեսական հաջողությունների հասնել, եթե վերացնեն առևտրային խոչընդոտներն ու ազգային սահմանափակումները։

Այս մասին նա ասել է հոկտեմբերի 9-ին Թուրքմենստանի «Ավազա» ազգային զբոսաշրջային գոտում ԱՊՀ երկրների առաջնորդների նեղ կազմով հանդիպման ժամանակ։

Պուտինի խոսքով՝ 2025 թվականի արդյունքներով Ռուսաստանի և ԱՊՀ մյուս երկրների միջև ապրանքաշրջանառությունը գերազանցել է 110 միլիարդ դոլարը, իսկ 2026 թվականի առաջին կիսամյակում աճել է ևս 19 տոկոսով։

«Կարելի՞ է ավելի արագ առաջ շարժվել։ Հավանաբար՝ կարելի է։ Դրա համար ի՞նչ է պետք անել։ Վերացնել խոչընդոտները։ Մենք ինքներս գիտակցաբար զսպում ենք զարգացման հնարավոր տեմպերը», – ասել է Ռուսաստանի նախագահը։

Նա նշել է, որ ԱՊՀ երկրների միջև հաշվարկների գրեթե ամբողջ ծավալն իրականացվում է ազգային արժույթներով, իսկ առևտրային գործարքներում դրանց մասնաբաժինը գերազանցել է 90 տոկոսը։ Պուտինի խոսքով՝ նման ֆինանսական ենթակառուցվածքը նպաստում է տնտեսական համագործակցության խորացմանը՝ չնայած արտաքին ազդեցությանը։

Ռուսաստանի նախագահը նաև նշել է, որ ԱՊՀ երկրների գործարար շրջանակներն իրականացնում են խոշոր արդյունաբերական և ենթակառուցվածքային ծրագրեր։ Նրա խոսքով՝ ձևավորվում են եվրասիական արտադրական և տրանսպորտային նոր շղթաներ, արդիականացվում են «Հյուսիս-Հարավ» և «Արևելք-Արևմուտք» միջազգային լոգիստիկ միջանցքները։

Պուտինի խոսքով՝ ԱՊՀ երկրները նաև արագացնում են ներմուծման փոխարինման գործընթացն ու ընդլայնում ապրանքների արտադրությունը։

Հանդիպումն անցկացվում է Թուրքմենստանում, որտեղ Պուտինը երկօրյա այցով է գտնվում։ Այցի շրջանակում նախատեսված է նաև Կասպյան բնապահպանական գագաթնաժողովը։