Երեւանում կանցկացվի «CYFEST 17» մեդիա արվեստի միջազգային փառատոնը

Երեւան: Մեդիամաքս: Հոկտեմբերի 15-ին Հայաստանում կմեկնարկի «CYFEST 17» մեդիա արվեստի միջազգային փառատոնը։

Հոկտեմբերի 15-ին, ժամը 18:00-ին, Գաֆէսճեան արվեստի կենտրոնում կներկայացվի «Natura Naturans. Մարդիկ, Բնություն, Բնապատկեր» ցուցադրությունը, որը համախմբում է ավելի քան 35 միջազգային արվեստագետների աշխատանքներ։ 

«Natura Naturans ցուցահանդեսը սերտ երկխոսություն է ծավալում Կասկադի ճարտարապետության եւ տարածական ռիթմի հետ։ Ներքին եւ արտաքին տարածքների փոխհարաբերությունը, ուղղահայաց շարժումը, դիտակետերի փոփոխությունը, բնական լույսը եւ շրջակա քաղաքային միջավայրը անմիջականորեն առնչվում են ցուցահանդեսի՝ լույսի, ընկալման, նյութական գործընթացների եւ տեխնոլոգիական համակարգերի հանդեպ հետաքրքրությանը։ Այս համատեքստում Կասկադը պարզապես ցուցադրության վայր չէ. այն Natura Naturans ցուցահանդեսի ընկալման եւ իմաստավորման անբաժանելի մասն է», – ասվում է կազմակերպիչների հաղորդագրության մեջ:

«CYFEST 17» փառատոնն անցկացվում է «CYLAND» հիմնադրամի եւ Գաֆէսճեան արվեստի կենտրոնի համագործակցությամբ։ Նախագծի գլխավոր հովանավորն է «Frants» հիմնադրամը։ Նախագիծն իրականացվում է Վենետիկի Կա’ Ֆոսկարի համալսարանի, Ռուսական, Կենտրոնական Ասիայի եւ Կովկասյան արվեստի ուսումնասիրության կենտրոնի (CSAR), MOMus ժամանակակից արվեստի թանգարան – Կոստակի հավաքածուի, «ARé Fest»-ի, Հայաստանի ազգային պատկերասրահի, Ինժեներական քաղաքի եւ «Art in Country of Tokyo» (AICOT)-ի հետ համագործակցությամբ։