Սիրելի՛ գրադարանավարներ,
սրտանց շնորհավորում եմ ձեզ մասնագիտական տոնի՝ Գրադարանավարի օրվա առթիվ։
Գիրքը պարզապես թղթին ամփոփված բառերի ամբողջություն չէ։ Գիրքը հիշողություն է, գիտելիք է, հոգևոր արժեք է և սերունդներին միմյանց կապող կամուրջ։ Իսկ այդ մեծ արժեքների պահապանը գրադարանավարն է։
Ձեր աշխատանքը հաճախ կատարվում է լուռ, առանց բարձրաձայնելու, բայց դրա արդյունքը տարիներ ու սերունդներ է ապրում։
Դուք եք երեխայի ձեռքը հանձնում նրա առաջին գիրքը, երիտասարդին ուղղորդում դեպի գիտելիքի աշխարհ, ընթերցողի համար բացում նոր մտքերի ու գաղափարների ճանապարհ և ամենակարևորը՝ պահպանում գրքի ու ընթերցանության նկատմամբ սերը։
Մեզանում գրադարանը եղել և մնում է ոչ միայն գիրք պահելու, այլև մարդ ու սերունդ կրթելու, մշակույթ և արժեքներ փոխանցելու կարևոր օջախ։ Այդ առաքելության շարունակության գործում ձեր նվիրումն ու աշխատանքը մեծ նշանակություն ունեն։
Այսօր, երբ ժամանակակից տեխնոլոգիաները և տեղեկատվություն ստանալու ձևերը փոխվում են, առավել կարևոր է պահպանել գրքի նկատմամբ սերն ու ընթերցելու մշակույթը, որովհետև գիտելիքով է կառուցվում ուժեղ մարդը, կրթությամբ՝ հզոր համայնքը, իսկ մշակույթով ու հիշողությամբ՝ ամուր պետությունը։
Գնահատելով ձեր նվիրական և պատասխանատու աշխատանքը՝ մաղթում եմ ձեզ քաջառողջություն, ստեղծագործական եռանդ, մասնագիտական նոր ձեռքբերումներ և արժանի գնահատանք։
Leave a Reply