Հայաստանը փորձում է ռուսական ռազմաբազայի դուրսբերման պատասխանատվությունը թողնել Ռուսաստանի վրա. Միխայիլ Կալուգին | Քաղաքականություն

Հայաստանը ցանկանում է Շիրակի ռազմաբազայի ապագայի  ամբողջ պատասխանատվությունը թողնել Ռուսաստանի վրա, հայտարարել է  ՌԴ Արտաքին գործերի նախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը։
«Ռազմաբազայի հնարավոր դուրսբերման պատասխանատվությունը Մոսկվայի վրա տեղափոխելու փորձերը տեղավորվում են ժամանակակից հայկական քաղաքական մտածողության տարօրինակ օրինաչափության մեջ։ Երևանի իշխող վերնախավը հաճախ ակնկալում է, որ ամենակարևոր որոշումները կկայացվեն արտաքին խաղացողների կողմից», – ասել է նա ՌԻԱ Նովոստիին տված հարցազրույցում։

Դիվանագետը օրինակներ է բերել. Հայաստանի ղեկավարությունը հայտարարում է, որ Եվրասիական տնտեսական միության (ԵԱՏՄ) և Եվրամիության միջև ընտրության վերաբերյալ հանրաքվե անցկացնելու համար նախ անհրաժեշտ է ապահովել Բրյուսելի դրական արձագանքը։ ՀԱՊԿ-ի վերաբերյալ ենթադրությունները հետևյալն են. եթե  Հայաստանին հեռացնեն ՀԱՊԿ-ից,ապա  կազատեն կառավարությանը հեռանալու կամ մնալու դիլեմայից։

Միևնույն ժամանակ, Ռուսաստանը պատրաստ է Հայաստանի հետ քննարկել Շիրակի ռազմաբազայի հետ կապված բոլոր հարցերը։ Կալուգինը ընդգծել է, որ երկխոսությունը հիմնված կլինի ռուսական զորախմբի ներկայությունը կարգավորող համաձայնագրերի վրա։

Սեպտեմբերի սկզբին նախագահ Վլադիմիր Պուտինը հայտարարեց, որ եթե Երևանը Շիրակի մարզում գտնվող բազան ավելորդ համարի, ռուսական կողմը անմիջապես կհեռանա այնտեղից և ոչինչ չի պարտադրի։
Ինչպես ընդգծում է Ռուսաստանի արտաքին գործերի նախարարությունը, այս ռազմական օբյեկտը կարևորագույն տարր է ինչպես Հայաստանի, այնպես էլ Հարավային Կովկասի անվտանգության ապահովման գործում։ Այն այնտեղ տեղակայված է 1995 թվականի միջպետական ​​պայմանագրով։ 2010 թվականին փաստաթուղթը փոփոխվեց. բազայի ժամկետը երկարաձգվեց սկզբնական 25 տարուց մինչև 2044 թվականը։