Սրբազան արարողությունից հետո նրան ընդունել է Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը։
Մայր Աթոռի հաղորդագրության մեջ ասված է.
«Նորին Սրբությունը ողջունեց հյուրի այցը Հայաստան եւ համայն հայության հոգեւոր կենտրոն՝ այն նկատելով պատեհ առիթ՝ ի մոտո ճանաչելու քրիստոնեությունն առաջինը պետական կրոն հռչակած երկիրը, հայ ժողովրդին ու նրա հոգեւոր-մշակութային հարուստ ժառանգությունը։ Վեհափառ Հայրապետը գոհունակություն հայտնեց նաեւ նախագահ Դոնալդ Թրամփի եւ ԱՄՆ հայ հոգեւոր առաջնորդների հանդիպման կազմակերպման գործում տիկին Ուայթ-Քեյնի ներդրած ջանքերի առնչությամբ։
Լուսանկարը` Մայր Աթոռ
Զրուցակիցներն ընդգծեցին կրոնի եւ հոգեւոր արժեքների դերը ժողովուրդների ապահով, բարօր ու առաջընթաց կյանքի կերտման գործում։ Շեշտվեց, որ առ Աստված հավատքը պետք է դրսեւորվի սիրով, արդարությամբ եւ մերձավորի հանդեպ հոգածությամբ՝ ամրապնդելով համամարդկային համերաշխությունն ու խաղաղ համակեցությունը։ Այս առնչությամբ կարեւորվեց հոգեւոր առաջնորդների համատեղ ջանքերը՝ ի նպաստ աշխարհում խաղաղության հաստատման եւ ժողովուրդների լուսավոր գալիքի։
Փոլա Ուայթ-Քեյնը շնորհակալություն հայտնեց Նորին Սրբությանը ջերմ ընդունելության համար եւ կիսվեց Սուրբ Պատարագից ստացած իր տպավորություններով` ընդգծելով սրբազան արարողության ընթացքում ապրած խոր ակնածանքն ու հոգեւոր խաղաղությունը։ Հյուրը երախտագիտությամբ անդրադարձավ նաեւ Հայաստանի հարուստ քրիստոնեական ժառանգությանը, որպես հայ ժողովրդի հավատքի կենդանի վկայություն»։
Leave a Reply