Գորիսի ավագանու ընտրություններին կմասնակցի երկու դաշինք․ ովքեր են գլխավորում նախընտրական ցուցակները

Հոկտեմբերի 25-ին կայանալիք Գորիսի համայնքի ավագանու համամասնական ընտրություններին մասնակցելու հայտ է ներկայացրել երկու դաշինք՝ «Ապրելու քվե» և «Համերաշխություն»։

 «Ապրելու քվե» դաշինքը ձևավորել են «Ապրելու երկիր» և «Հայկական քվե» կուսակցությունները։ Դաշինքի նախնական ցուցակում ընդգրկված է 17 թեկնածու, այն գլխավորում է Տեղ համայնքի ավագանու «Ապրելու երկիր» խմբակցության ղեկավար Արգամ Հովսեփյանը։

 «Համերաշխություն» դաշինքը ձևավորել են «Քաղաքացիական պայմանագիր» և «Գործարար» կուսակցությունները։ Դաշինքի նախնական ցուցակում ընդգրկված է 72 թեկնածու, ցուցակը գլխավորում է Գորիս համայնքի ղեկավար Առուշ Առուշանյանը։

Վերախոշորացվող Գորիս համայնքի ավագանին կունենա 27 անդամ։

«Ապրելու քվե» դաշինքի ցուցակը գլխավորող Արգամ Հովսեփյանն իր կենսագրության մեջ առանձնացնում է գյուղական համայնքում մեծացած լինելու և շուրջ երեք տասնամյակ համայնքային կառավարման ոլորտում աշխատելու փորձը։

Հովսեփյանը ծնվել է 1963թ. Արավուս գյուղում, սովորել տեղի տարրական, ապա Տեղի  Արամայիս Սարգսյանի անվան միջնակարգ դպրոցում։ Դպրոցն ավարտելուց հետո զբաղվել է գյուղատնտեսական աշխատանքներով` ծնողների հետ, ապա ծառայել բանակում։

Զորացրվելուց հետո վերադարձել է հայրենի գյուղ և ուսումը շարունակել Գորիսի պետական ուսումնարանում։ Արցախյան առաջին պատերազմի տարիներին, ըստ իր ներկայացրած կենսագրության, ստեղծել է Արավուսի ջոկատը և մասնակցել սահմանների պաշտպանությանը։

Հետագայում Հովսեփյանը զբաղվել է նաև համայնքային և վարչական աշխատանքով։ Նրա կենսագրության համաձայն՝ 1993 թվականից ղեկավարել է Արավուսի պետական ձեռնարկությունը, իսկ 1996 թվականին ընտրվել է Արավուսի գյուղապետ՝ այդ պաշտոնում հետագայում վերընտրվելով 6 անգամ։

2021 թվականից Հովսեփյանը «Ապրելու երկիր» կուսակցության անդամ է։ Նույն թվականին կուսակցության կողմից առաջադրվել է Տեղ համայնքի ավագանու թեկնածու և ընտրվել։

Հովսեփյանը ամուսնացած է, ունի երեք երեխա և ութ թոռ։ Իր առաջադրման մասին խոսելիս նա շեշտում է  շուրջ 27 տարվա համայնքային կառավարման փորձը և այն Գորիս համայնքի զարգացմանը ծառայեցնելու նպատակադրումը։

«Համերաշխություն» դաշինքի ցուցակը գլխավորում է Գորիսի համայնքի ղեկավար Առուշ Առուշանյանը։ Նա ծնվել է 1991 թվականի մարտի 12-ին Գորիսում։

Առուշանյանը դպրոցական կրթությունը ստացել է Գորիսի Սերո Խանզադյանի անվան թիվ 6 միջնակարգ դպրոցում։ Այնուհետև սովորել է Երևանի տնտեսագիտական համալսարանի ազգային տնտեսագիտության ֆակուլտետում, իսկ 2009 թվականին ուսումը շարունակել է Գորիսի պետական համալսարանի տնտեսագիտության ֆակուլտետում, որն ավարտել է 2011 թվականին՝ ստանալով տնտեսագիտության բակալավրի աստիճան։ Հետագայում նույն ֆակուլտետի մագիստրատուրայում շարունակել է ուսումը և ավարտել 2014 թվականին։

Առուշանյանը զբաղվել է նաև ձեռնարկատիրությամբ. 2008 թվականին հիմնադրել է «Գոր Մետալ» ՍՊԸ-ն և, ըստ հրապարակված կենսագրական տվյալների, ղեկավարել ընկերությունը։

Նրա քաղաքական գործունեությունը սկսվել է ավելի վաղ։ 2016 թվականին ընտրվել է Հայաստանի Ազգային ժողովի պատգամավոր, իսկ 2017 թվականի նոյեմբերի 5-ին՝ Գորիսի քաղաքապետ։

Ներկայում Առուշանյանը Գորիսի համայնքի ղեկավարն է և առաջիկա ավագանու ընտրություններին գլխավորում է «Համերաշխություն» դաշինքի նախընտրական ցուցակը։ 2026 թվականի ընտրություններին նրա գլխավորած «Գործարար»  կուսակցությունը մասնակցում է «Քաղաքացիական պայմանագիր» կուսակցության հետ ձևավորված «Համերաշխություն» դաշինքի կազմում։

Այսպիսով, հոկտեմբերի 25-ի ընտրություններին Գորիսում առաջադրված երկու դաշինքի նախընտրական ցուցակները գլխավորում են համայնքային կառավարման տարբեր փորձառություն ունեցող քաղաքական գործիչներ. Արգամ Հովսեփյանը՝ Տեղ համայնքի ավագանու անդամ է աշխատանքից և երկարամյա համայնքային կառավարման փորձից հետո, իսկ Առուշ Առուշանյանը՝ Գորիսի համայնքի ղեկավարի պաշտոնում աշխատելուց հետո։

Գորիս համայնքի ավագանու անդամների թեկնածուների ցուցակինկարող եք ծանոթանալ… ( https://mediapoint.am/archives/16571?fbclid=IwY2xjawUsPttleHRuA2FlbQIxMQBwZG9mBXNydGMGYXBwX2lkEDIyMjAzOTE3ODgyMDA4OTIAAR4vMIVQJxOBQeZIgQ190Qekq_6jFypKBE43oOt5-m0tY7hdClUFWmn4gPMxVg_aem_yrSWHK6wWOlJ-2Oj9kWQwA )