Իրանի գլխավոր օդանավակայանը շարունակում է լիարժեք գործել՝ չնայած ԱՄՆ պատժամիջոցներին

Թեհրանի «Իմամ Խոմեյնի» միջազգային օդանավակայանի գործադիր տնօրեն Ռամին Քաշեֆ-Ազարը հայտարարել է, որ օդանավակայանը շարունակում է լիարժեք գործել՝ չնայած Իրանի ավիացիոն ոլորտի նկատմամբ ԱՄՆ-ի սահմանած պատժամիջոցներին։

«Արմենպրես»-ի փոխանցմամբ՝ այս մասին հայտնում է Al Jazeera-ն։Նա իրանական լրատվամիջոցներին հայտնել է, որ օդանավակայանը շարունակում է սպասարկել ավելի քան 30 միջազգային ուղղություն։ Նրա խոսքով՝ սեպտեմբերի 23-ին՝ պատժամիջոցների ուժի մեջ մտնելու օրը, օդանավակայանում հաջողությամբ իրականացվել է 60 չվերթ։

ԱՄՆ ֆինանսների նախարարությունը սեպտեմբերի 8-ին պատժամիջոցներ է սահմանել 27 ավիաընկերությունների նկատմամբ՝ ներառելով նաև իրանական մնացած ավիափոխադրողներին, որոնք նախկինում պատժամիջոցների տակ չէին գտնվում։

ԱՄՆ ֆինանսների նախարար Սքոթ Բեսենթը նշել է, որ օդանավակայաններն ու ընկերությունները, որոնք Իրանի կողմից շահագործվող ինքնաթիռներին ապահովում են վառելիքով, վայրէջքի ծառայություններով կամ տոմսերի վաճառքով, կարող են ենթարկվել երկրորդական պատժամիջոցների, որոնք կարող են նրանց կտրել ԱՄՆ ֆինանսական համակարգից։ Օմանը և ԱՄԷ-ն այդ ժամանակվանից ի վեր կասեցրել են իրանական չվերթները։

Բացի այդ, Իրաքի չորս օդանավակայաններ նույնպես դադարեցրել են թռիչքները։

Իրանական ավիաընկերությունները շարունակում են թռիչքներ իրականացնել դեպի մի շարք երկրներ, այդ թվում՝ Չինաստան և Ռուսաստան։