Թրամփը Հռոմի ստատուտի բոլոր երկրներին կոչ է արել դուրս գալ ՄՔԴ–ի կազմից

ԱՄՆ նախագահ Դոնալդ Թրամփը կոչ է արել Հռոմի ստատուտի մասնակից բոլոր երկրներին դուրս գալ Միջազգային քրեական դատարանի (ՄՔԴ) կազմից: Այս մասին, ինչպես փոխանցում է Reuters-ը, նա հայտարարել է Նյու Յորքում ՄԱԿ-ի Գլխավոր վեհաժողովում։

«Ես կոչ եմ անում բոլոր այն երկրներին, որոնք ՄՔԴ անդամ են, անհապաղ պաշտոնապես դուրս գալ այդ ոչ լեգիտիմ կազմակերպությունից», — ասել է Թրամփը:

ԱՄՆ նախագահը նշել է, որ ԱՄՆ-ն թույլ չի տա ՄՔԴ-ին «ցուցադրական գործընթացներ» իրականացնել ամերիկացի զինծառայողների դեմ: Թրամփը դատարանն անվանել է «վերահսկողությունից դուրս եկած ինստիտուտ» և «չար մարդկանց խումբ»:

Հայաստանը ՄՔԴ անդամ է դարձել 2024 թվականի փետրվարից՝ վավերացնելով Հռոմի կանոնադրությունը՝ իբր Բաքվի ռազմական հանցագործությունների թեման բարձրացնելու համար։ Հայցերին այդպես էլ ընթացք չի տրվել, փոխարենը Երևանի այս որոշումը դարձել է Ռուսաստանի հետ հարաբերությունների վատթարացման շղթայի օղակներից մեկը, քանի որ ավելի վաղ դատարանը նախագահ Վլադիմիր Պուտինին ձերբակալելու օրդեր էր տվել:

Հռոմի ստատուտը միջազգային պայմանագիր է, որի հիման վրա ստեղծվել և գործում է Միջազգային քրեական դատարանը: ՄՔԴ-ին վստահվել է հետաքննել և քննել չորս կատեգորիաների պատկանող ծանր հանցագործություններով գործեր՝ ցեղասպանություն, պատերազմական հանցագործություններ, մարդկության դեմ հանցագործություններ և ագրեսիայի հանցագործություններ: Այն մասնագիտանում է այդ հանցագործությունների մեղավորներին պատասխանատվության ենթարկելու և նրանց զոհերի համար արդարություն ապահովելու մեջ:

arm.sputniknews.ru/