Սեպտեմբերի 21-ը պետք է դառնա Հայաստանի ինքնիշխանության վերականգնման օրը․ Խաչիկ Ասրյան

Սեպտեմբերի 21-ին Հայաստանը նշում է Անկախության 35-րդ տարեդարձը։

Սակայն այսօր ես չեմ կարող պարզապես շնորհավորել Հայաստանի անկախության տարեդարձը։

Անկախությունը միայն օրացույցի ամսաթիվ չէ։ Անկախությունը պետության՝ սեփական տարածքի, անվտանգության, որոշումների և ապագայի նկատմամբ իրական իշխանությունն ու պատասխանատվությունն է։

Վերջին տարիների ընթացքում Հայաստանի տարածքային ամբողջականությունը խախտվել, ոտնահարվել ու մասնատվել է թշնամի, հայատյաց Ադրբեջանի կողմից, ինչպես նաև նույն Ադրբեջանի կողմից լուրջ հարվածներ են հասցվել Հայոց պետականության անվտանգությանը և ինքնուրույն որոշումներ կայացնելու կարողությանը։ Այս իրողության պայմաններում անկախության մասին խոսելն առանց ինքնիշխանության վերականգնման նշանակում է ունենալ անկախության միայն անվանումը՝ զրկված դրա իրական բովանդակությունից։

Ադրբեջանը, հատկապես 2021 թվականի մայիսի 12-ից սկսած, ներխուժել է Հայաստան և խախտել, ոտնահարել ու մասնատել է Հայաստանի տարածքային ամբողջականությունը, այսինքն՝ նրա անկախությունն ու ինքնիշխանությունը։ Այժմ էլ Ադրբեջանը՝ ցեղասպան Թուրքիայի հետ միասին և օտարերկրյա պետությունների աջակցությամբ, փորձում է ամբողջությամբ ոչնչացնել Հայաստանը։

Չե՛նք թողնելու։

Այսօր մեզ անհրաժեշտ է ոչ թե պարզապես նշել անկախության տարեդարձը, այլ վերաիմաստավորել անկախությունը և վերականգնել դրա իրական բովանդակությունը՝ Հայաստանի ինքնիշխանությունը։

Անկախությունը ինքնիշխանության հիմքն է, իսկ ինքնիշխանությունը՝ այդ անկախությունը իրական ուժով և բովանդակությամբ ապահովելու կարողությունը։

Ինքնիշխանությունը պարզապես անկախության իրավական փաստ չէ։ Այն սեփական պետությունը կառուցելու կարողություն է, ինքնուրույն որոշումներ կայացնելու ազատություն, այդ որոշումների համար պատասխանատվություն ստանձնելու պատրաստակամություն և սեփական ապագան սեփական ուժերով կերտելու քաղաքական կամք։

Անկախ և ինքնիշխան Հայաստանը պետք է լինի պետություն, որն ինքն է տնօրինում իր ճակատագիրը և ինքն է կրում իր որոշումների ամբողջ պատասխանատվությունը։

Այդպիսի պետության հիմքում պետք է լինեն՝

իրական և անսակարկելի անկախությունը,

քաղաքական ինքնիշխանությունը,

տարածքային ամբողջականությունն ու սահմանների պաշտպանությունը,

ազգային անվտանգությունն ու պաշտպանունակությունը,

ինքնուրույն արտաքին քաղաքականությունը,

տնտեսական ինքնուրույնությունը,

ուժեղ, արդյունավետ և հաշվետու պետական ինստիտուտները,

քաղաքական կամքն ու պետական մտածողությունը,

սեփական որոշումների համար պատասխանատվություն ստանձնելու կարողությունը,

օրենքի գերակայությունն ու արդարադատությունը։

Սա պարզապես ցանկ չէ։ Սա անկախության և ինքնիշխանության վերականգնման օրակարգ է։

Մենք պետք է կառուցենք այնպիսի Հայաստան, որի անվտանգությունը ուրիշների բարեհաճությունից կախված չէ, որի սահմանները պաշտպանված ու անառիկ են, որի որոշումները կայացվում են Երևանում, որի արտաքին քաղաքականությունն ինքնուրույն է և բխում է Հայաստանի ազգային ու պետական շահերից, որի տնտեսությունը կարող է դիմակայել ճնշումներին, որի պետական ինստիտուտները ծառայում են պետությանը և քաղաքացուն, որի իշխանությունը սեփական ժողովրդի առաջ պատասխանատու է իր յուրաքանչյուր որոշման համար, և որտեղ օրենքի գերակայությունն ու արդարադատությունը հավասար են բոլորի համար։

Անկախությունն ու ինքնիշխանությունը մեզ ոչ ոք չի նվիրելու։ Այն պետք է վերականգնել և ամրապնդել սեփական կամքով, գիտելիքով, աշխատանքով, ուժով և պատասխանատվությամբ։

Հետևաբար, սեպտեմբերի 21-ը ես ընկալում եմ ոչ միայն որպես անցած ճանապարհը հիշելու օր, այլև որպես պահանջ՝ ավարտին հասցնելու անկախության գործը։

Իրական անկախությունն այն է, երբ պետությունն ինքն է որոշում իր ճակատագիրը։

Անկախ և ինքնիշխան Հայաստան՝ իր տարածքով, իր անվտանգությամբ, իր որոշումներով, իր պատասխանատվությամբ և իր ապագան ինքնուրույն կերտելու իրավունքով։

Խաչիկ Ասրյան

«Հայոց Արծիվներ. Միասնական Հայաստան» կուսակցության հիմնադիր Նախագահ,

«Սյունյաց Արծիվներ» և «Հայոց Արծիվներ» հայրենասիրական հասարակական կազմակերպությունների հիմնադիր Նախագահ,

«Հայոց Արծիվներ» կամավորական մարտական ջոկատի հիմնադիր Հրամանատար,

44-օրյա, Ապրիլյան և Արցախյան պատերազմների կամավոր մասնակից,

«Մարտական Խաչ» 1-ին աստիճանի շքանշանակիր,

Պահեստազորի Գնդապետ,

2007–2018 թվականներին՝ ՀՀ Սպորտի և Երիտասարդության հարցերի փոխնախարար աշխատած։

Կից ներկայացվում են Խաչիկ Ասրյանի կենսագրությունը՝ Ֆեյսբուքի էջում, ինչպես նաև այլ կարևոր նյութեր։

Խաչիկ Ասրյան