Սյունիքն առաջատարն է․ միջին ամսական անվանական աշխատավարձը Հայաստանում

2026 թվականի հուլիսին Հայաստանում միջին ամսական անվանական աշխատավարձը կազմել է 320 763 դրամ՝ նախորդ տարվա նույն ամսվա համեմատ աճելով 5.3%-ով, իսկ հունիսի համեմատ՝ 3.9%-ով։

Պետական հատվածում հուլիսի միջին աշխատավարձը կազմել է 284 963 դրամ, ոչ պետականում՝ 333 834 դրամ։ Սակայն ընդհանուր միջինից ավելի խոսուն են ոլորտների, մարզերի և տարբեր չափի կազմակերպությունների միջև տարբերությունները։

Ոլորտների միջև տարբերությունը մոտ 5.6 անգամ է

Հունիսի մանրամասն տվյալներով՝ ամենաբարձր միջին աշխատավարձը գրանցվել է տեղեկատվության և կապի ոլորտում՝ 846 138 դրամ։ Հաջորդել են ֆինանսական ու ապահովագրական գործունեությունը և հանքարդյունաբերությունը։

Կրթության, կացության ու հանրային սննդի կազմակերպման ոլորտներում միջին աշխատավարձը չի հասել 200 հազար դրամի։

Ոլորտ/ Հունիսի միջին աշխատավարձը, դրամ

Տեղեկատվություն և կապ -846 138

Ֆինանսական և ապահովագրական գործունեություն- 796 527

Հանքագործական արդյունաբերություն և բացահանքերի շահագործում- 595 719

Մշակող արդյունաբերություն- 258 978

Մեծածախ և մանրածախ առևտուր, ավտոմեքենաների և մոտոցիկլների նորոգում- 243 886

Կրթություն- 176 576

Կացության և հանրային սննդի կազմակերպում- 161 501

Սպասարկման այլ ծառայություններ-151 537

Տեղեկատվության և կապի ոլորտի միջին աշխատավարձը կրթության ցուցանիշը գերազանցել է մոտ 4.8 անգամ, իսկ ամենացածր միջինն ունեցող՝ սպասարկման այլ ծառայությունների ոլորտի ցուցանիշը՝ շուրջ 5.6 անգամ։

Ամենաբարձր ցուցանիշը Երևանում չէ

2026 թվականի երկրորդ եռամսյակում միջին աշխատավարձով առաջատարը Սյունիքն է եղել՝ 428 618 դրամով։ Երևանում ցուցանիշը կազմել է 357 583 դրամ, ամենացածրը գրանցվել է Գեղարքունիքում՝ 158 949 դրամ։ Սյունիքի և Գեղարքունիքի ցուցանիշների տարբերությունը մոտ 2.7 անգամ է։

Զգալի տարբերություն կա նաև գործատուի չափից կախված։ Հունիսին 1-9 աշխատող ունեցող կազմակերպություններում միջին աշխատավարձը կազմել է 146 642 դրամ, իսկ 250 և ավելի աշխատող ունեցողներում՝ 426 188 դրամ։ Խոշոր կազմակերպությունների ցուցանիշը մոտ 2.9 անգամ բարձր է եղել։

Միասնական սոցիալական ծառայության հետ համագործակցող գործատուների ներկայացրած տվյալներով՝ հունիսի վերջին հաշվառված է եղել 3 656 թափուր աշխատատեղ։ Յուրաքանչյուրի հաշվով եղել է 9 գրանցված աշխատանք փնտրող։