Նարեկ Նալբանդյանին բերման ենթարկելու տեսանյութը հին է. ՆԳՆ

Գործարար Նարեկ Նալբանդյանին բերման ենթարկելու կադրերը նկարահանվել են մեկ ու կես տարի առաջ: Տեղեկությունը Sputnik Արմենիային հայտնեցին ՀՀ ներքի գործերի նախարարությունից։

«Տեսանյութը շուրջ 1 ու կես տարի առաջ է նկարահանված: Այդ պահին ՆԳՆ ոստիկանության ծառայողները մի քանի անձանց տեղափոխում են ոստիկանություն՝ ուղեկցումով երթևեկելու համար»,– նշված է պարզաբանման մեջ:

Ավելի վաղ, «Իշխանություն» լրատվական տեսանյութ էր հրապարակել` նշելով, որ Նալբանդյանին բերման են ենթարկում զինված իրավապահները։

Հիշեցնենք, որ ՀՀ վարչապետ Նիկոլ Փաշինյանը սեպտեմբերի 3-ին հայտարարեց, որ հանձնարարել է իրավապահ մարմիններին ուսումնասիրություն կատարել գործարար Նարեկ Նալբանդյանի հետ կապված՝ հաշվի առնելով նաև մամուլում հայտնված տեղեկությունները, թե Նալբանդյանն իշխանությունների «սրտի օլիգարխն է»։

Վարչապետը նշեց, թե իրեն ներվայնացնում է այն հանգամանքը, որ Նարեկ Նալբանդյանն ինքը չի հերքում իր կապը Փաշինյանի ընտանիքի հետ։ Կարճ ժամանակ անց Նալբանդյանը հայտարարություն տարածեց` նշելով, որ կապեր չունի ո՛չ ներկա, ո՛չ նախկին, ո՛չ էլ որևէ քաղաքական ուժի հետ։

Նույն օրը Նալբանդյանին պատկանող «88» սուպերմարկետների ցանցի գործունեության վերաբերյալ քրեական վարույթ հարուցելու մասին տեղեկություններ տարածեցին, որի մասին ՀՀ գլխավոր դատախազությունը պարզաբանում տվեց` նշելով, որ դա հարուցվել է դեռ 2026 թվականի փետրվարի 26–ին։