Սյունիքի մարզի խորհրդի նիստում ամփոփվել են ընթացիկ ծրագրերն ու խնդիրները

Օգոստոսի 25-ին Սյունիքի մարզպետ Ռոբերտ Ղուկասյանի նախագահությամբ տեղի է ունեցել մարզի խորհրդի ընդլայնված նիստը, որին մասնակցել են համայնքների ղեկավարները, մարզային և պետական կառույցների ներկայացուցիչները։

Նիստում քննարկվել են համայնքների բյուջեների կատարողականը, սուբվենցիոն ծրագրերը, գյուղատնտեսական խնդիրները և հրդեհների կանխարգելման աշխատանքները։

2026 թվականի առաջին կիսամյակում համայնքների սեփական եկամուտները կազմել են 2 մլրդ 252 մլն դրամ՝ նախորդ տարվա նույն ժամանակահատվածի համեմատ աճելով 24,4 տոկոսով։ Մարզում իրականացվում է 31 սուբվենցիոն ծրագիր՝ 8,173 մլրդ դրամ ընդհանուր արժեքով, ևս 9 ծրագիր գտնվում է նախապատրաստական փուլում։

Գյուղատնտեսության ոլորտում անդրադարձ է կատարվել Մեղրիում թզի մթերմանը։ Այս պահին վերամշակման նպատակով մթերվել է ավելի քան 10 տոննա թուզ, իսկ գործընթացում ներգրավված է 6-ից ավելի մթերող ընկերություն։ Յուրաքանչյուր կիլոգրամ մթերվող թզի համար պետական աջակցության շրջանակում նախատեսված է 125 դրամ օժանդակություն։

Քննարկվել են նաև անտառային և բուսածածկ տարածքներում հրդեհների կանխարգելման միջոցառումները։

Ամփոփելով նիստը՝ մարզպետ Ռոբերտ Ղուկասյանը կարևորել է խնդիրների նկատմամբ հետևողական մոտեցումն ու համայնքների, մարզային և պետական կառույցների արդյունավետ համագործակցությունը։