Blog

Աշխատանքային պրոցեսներ են գնում, այնպես չի, որ մեկը գրավոր պարտավորագիր կամ առաջարկ է տվել, որ ես 400 մլն պատրաստ եմ վճարել, բայց բանավոր մակարդակում այդպիսի քննարկում կա, կառավարության նիստից հետո լրագրողներին ասել է վարչապետ Նիկոլ Փաշինյանը՝ անդրադառնալով երկաթուղու կառավարումն այլ երկրին փոխանցելու հարցին։

«Վատ գին չի թվում, լավ գին ա թվում, արդար գին ա թվում, այսինքն՝ էս ժանրի խոսակցություն է»,-ասել է Փաշինյանը՝ նշելով, որ պաշտոնական մակարդակներով էլ է այդ ամենի մասին խոսվել։

Ռուսաստանը չի միջամտում Հայաստանի ներքին գործերին, սակայն չի կարող անտարբեր մնալ հանրապետությունում ծավալվող իրադարձությունների նկատմամբ։ Այս մասին ճեպազրույցի ընթացքում հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան՝ անդրադառնալով Հայաստանում վերջին շրջանում իրականացված ձերբակալություններին։

ՌԴ ԱԳՆ խոսնակի փոխանցմամբ՝ Մոսկվայում ակնկալում են, որ հայ-ռուսական երկկողմ գործակցության ամրապնդման ուղղությամբ ջանքեր գործադրող քաղաքական դաշինքները, կուսակցությունները, հասարակական գործիչներն ու ակտիվիստները հնարավորություն կունենան հանգիստ մասնակցել Հայաստանի ներքաղաքական կյանքին։

Զախարովան ընդգծել է, որ Ռուսաստանը Հայաստանը համարում է եղբայրական երկիր, սակայն նկատել է, որ վերջին զարգացումները ընթանում են երկկողմ հարաբերություններին և Ռուսաստանին առնչվող կարգախոսների ներքո։ Նրա գնահատմամբ՝ նման մոտեցումը հակասում է պաշտոնական Երևանի հավաստիացումներին, թե իշխանությունները չեն ցանկանում վատթարացնել հարաբերությունները Մոսկվայի հետ։

Անդրադառնալով Հայաստանի արտաքին քաղաքական վեկտորին՝ ՌԴ ԱԳՆ պաշտոնական ներկայացուցիչը վերահաստատել է Մոսկվայի դիրքորոշումը, ըստ որի՝ Հայաստանը չի կարող միանալ Եվրոպական միությանը և միաժամանակ պահպանել անդամակցությունը Եվրասիական տնտեսական միությանը (ԵԱՏՄ)։

«Երևանը մինչ օրս հարկ չի համարել ԵԱՏՄ-ի հետ համաձայնեցնել եվրաինտեգրման իր ձգտումները»,- հայտարարել է Զախարովան՝ հավելելով, որ Եվրամիությունը նպատակ ունի խաթարել ԵԱՏՄ տարածքում առկա ինտեգրացիոն, տնտեսական և համագործակցային կապերը։

ՌԴ ԱԳՆ խոսնակը եզրափակել է, որ եթե Եվրամիության քաղաքականությունն այլ լիներ, հնարավոր կլիներ դիտարկել որոշակի տարբերակներ, սակայն ներկայում նման հնարավորություններ գոյություն չունեն։