Category: Orer

Lifestyle
14 Հուլիս, 2026 11:34

«Փաստ» օրաթերթը գրում է.

Տոսկանական Տենուտա Սան կալվածքի սեփականատեր մարկիզ Մարիո Ինչիզա դելլա Ռոկետտան մեծապես հիանում էր Բորդոյի գինիներով։ Հետևաբար, տոսկանական օրենքներին հակառակ, նա իր խաղողի այգիներում տնկել է ֆրանսիական Կաբեռնե Սովինյոն և Կաբեռնե Ֆրանկ որթատունկեր։ Գինեգործ Ջակոմո Տաչիզան էլ օգնել է ստացված խաղողից գինի պատրաստել, և 1943 թվականից ի վեր կալվածքի սեփականատերերը վայելել են սեփական արտադրության գերազանց կարմիր գինին։ Առաջին «Սասսիկայա» գինին, որը թարգմանաբար նշանակում է «քարոտ տարածք», շուկայում հայտնվել է միայն 1968 թվականին՝ դասակարգվելով որպես vino de tavola, այսինքն՝ սեղանի գինի։

Առաջին համտեսը, որտեղ այդ գինին սենսացիա է առաջացրել, կազմակերպվել է 1974 թվականին Decanter ամսագրի կողմից։ Իտալական ինչ-որ գյուղից այդ քիչ հայտնի գինին բոլոր առումներով գերազանցել է հայտնի Բորդոյի գինիներին, որոնք ունեին Grand Cru կարգավիճակ։ Ամերիկացի քննադատ Ռոբերտ Փարքերը 1985 թվականի «Սասսիկայա» գինուն տվել է 100 միավոր։ Հետագա համտեսողները պակաս ոգևորված էին այդ գինով, բայց բոլորը հիանում էին դրա անհավանական հարստությամբ և համեմատում այն Պոմերոլի լավագույն գինիների հետ։ Այսպիսով, Սասսիկայան դարձել է Կաբեռնե Սովինյոնի՝ խաղողի գինիների չափանիշերից մեկը և առաջին գինին, որը ստացել է իր սեփական DOC կարգավիճակը։

Ի դեպ, չնայած մասնագետների ոգևորված գովասանքին, «Սասսիկայան» ստացել է իր DOC անվանումը միայն իր սկզբնական թողարկումից 20 տարի անց։ Այժմ «Սասսիկայան» բաղկացած է 80 % Կաբեռնե Սովինյոնից և 20 % Կաբեռնե Ֆրանկից։ Երիտասարդ գինին լցվում է կաղնե տակառների մեջ, հնեցվում է առնվազն երկու տարի, ապա շշալցվում և հնեցվում ևս մեկ տարի։

Ֆրանսիական խաղողից պատրաստված այս իտալական գինին հիմնականում արտահանվում է Միացյալ Նահանգներ։ Ամերիկացիները սիրում են հարուստ համով և բույրով այս գինիները։ Կա նույնիսկ մի տեսություն, որ իտալացիներն այս գինիները արտադրում են հատուկ արտասահմանյան սպառողների, այլ ոչ թե իրենց համար։

Ինչևէ, «Սասսիկայայի» պատմությունը հանգեցրել է այլ ոչ ավանդական գինիների ի հայտ գալուն, ինչպիսիք են «Օրնելայան» և «Սոլայան»։ Աստիճանաբար Իտալիայում զարգացել է բոլոր կանոններին հակառակ ստեղծված գինիների մի խումբ, որոնք այժմ միասին հայտնի են որպես «Սուպեր տոսկանականներ»։ Այս գինիներից շատերը դեռևս պիտակավորվում են որպես vino de tavola, բայց, չնայած դրան, ունեն գերազանց համ և շատ սիրված են ոչ միայն սովորական սպառողների, այլ նաև նուրբ գինիների հավաքորդների շրջանում։

Հետաքրքիր է, որ «Սասսիկայա» գինին կարելի է գտնել նաև Հայաստանում, թեև այն ներկայացված է սահմանափակ քանակությամբ և համարվում է պրեմիում դասի գինի։ Եթե ցանկանում եք գնել այն Հայաստանում, խորհուրդ է տրվում նախապես ճշտել առկայությունը, քանի որ հատկապես բարձր գնահատված տարեթվերի շշերը հաճախ արագ են սպառվում։

Մանրամասները՝ «Փաստ» օրաթերթի այսօրվա համարում

Միջազգային
14 Հուլիս, 2026 10:32

«Փաստ» օրաթերթը գրում է.

ritmeurasia.ru–ն իր «Ճգնաժամի նոր փուլ Հայաստանում» վերնագրով հոդվածում գրում է, որ Հայաստանի Սահմանադրական դատարանը կողմ է քվեարկել Նիկոլ Փաշինյանին և մերժել խորհրդարանական ընտրությունների ակնհայտ կեղծման վերաբերյալ ընդդիմության բոլոր բողոքները։ Այսպիսով, ընդդիմությունն այլևս չունի իրավական միջոցներ իրավիճակի վրա ազդելու համար։ Գործող վարչապետը և նրա թիմը պահպանում են իշխանությունը, խորհրդարանում մեծամասնություն են կազմում և կարող են ինքնուրույն ձևավորել նոր կառավարություն:

Սահմանադրական դատարանի որոշումն ինքնին, առանց որևէ բացատրության, արդեն իսկ լուրջ հարցեր է առաջացնում արդարության վերաբերյալ, քանի որ որոշումը փաստացի անտեսել է յոթ ընդդիմադիր քաղաքական ուժի, այդ թվում՝ «Ուժեղ Հայաստան» և «Հայաստան» դաշինքների կողմից պնդված բազմաթիվ և լայնածավալ խախտումները։ Այդ խախտումները համակարգային են և, ըստ ընդդիմության և դիտորդների, պետք է հանգեցնեին արդյունքների առնվազն վերանայման, այլ ոչ թե դրանց հաստատման։ Նախևառաջ՝ ընտրություններն ուղեկցվել են վարչական ռեսուրսի զանգվածային օգտագործմամբ և ընտրողների վրա ճնշումներով։ Գրանցվել են ընտրության օրը ընդդիմադիր ուժերի ներկայացուցիչների ձերբակալման և հարցաքննության բազմաթիվ դեպքեր, ինչը ստեղծել է վախի մթնոլորտ։ Քվեարկության գործընթացն ինքնին խաթարվել է լուրջ տեխնիկական խախտումներով. հանձնաժողովի անդամները մատիտով լրացրել են ձևաթղթերը, քվեատուփերը մնացել են չկնքված, իսկ որոշ ընտրատեղամասերում իշխող կուսակցության ներկայացուցիչները քվեարկության խցիկներում ուղղակի ճնշում են գործադրել ընտրողների վրա։ Ավելին, գրանցվել են քվեաթերթիկներն ընտրատեղամասերից դուրս տանելու և ընդդիմության ներկայացուցիչների վրա հարձակումների դեպքեր։ Հատկապես վրդովեցուցիչ են այն տվյալները, որոնք վկայում էին ընտրողների ցուցակների և ձայների հաշվարկի հնարավոր մանիպուլ յացիաների մասին: Հայտնաբերվել է 846 հասցե, որոնցից յուրաքանչյուրում գրանցված է եղել առնվազն 20 մարդ, և շատ բնակիչներ չգիտեին իրենց հասցեներում գրանցված անձանց, ովքեր, այնուամենայնիվ, մասնակցել են քվեարկությանը: Անվավեր քվեաթերթիկների թիվը նույնպես կտրուկ աճել է՝ հասնելով 17097-ի, ինչը բավարար է մեկ խորհրդարանական մանդատ ապահովելու համար: Ընդդիմությունը պնդում է, որ իրենց օգտին տրված քվեաթերթիկները հաճախ անվավեր են ճանաչվել կեղծ պատճառներով: Դատարանի կողմից այս և շատ այլ համակարգային խախտումների անտեսումը, որոնք փաստաթղթավորվել են ոչ միայն ընդդիմության, այլ նաև տեղական դիտորդների կողմից, նշվել են ԵԱՀԿ զեկույցներում որպես ծայրահեղ բախումային արշավի և ընդդիմադիր գործիչների քրեական հետապնդման ապացույց:

Սակայն ՍԴ–ի որոշումը ոչ միայն չի լուծել քաղաքական ճգնաժամը, այլ նաև հանգեցրել է քաղաքական բռնապետության ամրապնդմանը, սոցիալական բաժանումների խորացմանը և պետական ինստիտուտների նկատմամբ վստահության անկմանը, քանի որ նախադեպ է ստեղծում, որի համաձայն, ընտրական գործընթացի կոպիտ խախտումները մնում են անպատիժ: Այս ֆոնին հետաքրքիր կլինի տեսնել, թե ինչ լեզու կօգտագործեն դատավորներն իրենց վիճահարույց որոշումը արդարացնելու համար: Սակայն իրավական տեսանկյունից դա այլևս որևէ հետևանք չի ունենա, և կառավարության ու ընդդիմության միջև առճակատումը կշարունակվի այլ ձևերով։

Կառավարության պաշտոնյաները պաշտոնական հայտարարությունների և սոցիալական ցանցերում գրառումների միջոցով գոհունակություն են հայտնել ՍԴ–ի որոշման վերաբերյալ։

Այսպիսով, մենք ականատես ենք մի իրավիճակի, երբ Հայաստանի պետական կառավարման մարմինները, որոնք ներկայացնում են իշխանության տարբեր ճյուղեր և պարտավոր են լինել միմյանցից անկախ, միաձայն են երգում, աջակցում միմյանց, կրկնում նույն թեզերը և մասնակցում իշխանության բացահայտ բռնագրավման գործընթացին։ Բանն այն է, որ վարչապետը վայելում է Արևմուտքի բացահայտ հովանավորությունը և փաստացի ստացել է քարտ-բլանշ ընդդիմությանը ճնշելու համար։ Եվ ներկայիս ընտրություններն այդ գործընթացի գագաթնակետն են։

Հայաստանի ընդդիմությունը Սահմանադրական դատարանի որոշումն ընկալել է որպես քաղաքական դիմադրության նոր փուլի սկզբի ազդանշան: Նրանք հայտարարել են, որ Սահմանադրական դատարանի վճիռը օրինականացնում է անարդար ընտրությունները: Ընդդիմությունը հայտարարել է, որ երկրի ներկայիս ղեկավարության հեռացումը իշխանությունից իր գլխավոր նպատակն է։

Այստեղ ամենակարևորն այն է, որ ընդդիմությունն ընդունել է պայքարի նոր ձևերի անցումը։ Նախ՝ «Հայաստան» և «Ուժեղ Հայաստան» դաշինքները ստացել են իրենց մանդատները՝ դրանք անվանելով իշխանություններին դիմադրելու «զենք» և այլ մեթոդների հետ համատեղ իրավական գործիք։ Երկրորդ՝ փողոցային բողոքի ցույցերը և զանգվածային մոբիլիզացիան են մնում հիմնական մեթոդ, որը ընդդիմությունը մտադիր է բարձրացնել նոր մակարդակի։ Երրորդ՝ ընդդիմությունը նախատեսում է ստեղծել համակարգային և ինստիտուցիոնալ դիմադրության կառուցվածք, որը կգործի հստակ պլանի համաձայն, և ոչ միայն հանրահավաքների միջոցով։ Եվ վերջապես՝ բնակչության տարբեր շերտերի հետ համագործակցելով՝ հասարակական կարծիքի փոփոխությունն է համարվել կարևոր խնդիր հուսահատությունը հաղթահարելու և իշխանափոխության հասնելու համար։

Պայքարի այս տարբեր մեթոդների հեռանկարների վերլուծությունը ցույց է տալիս, որ դրանցից յուրաքանչյուրի արդյունավետությունը առանձին-առանձին կասկածելի է։ Խորհրդարանում տեղերը ընդդիմության համար հարթակ և իրավական լծակներ են տրամադրում, բայց դրանք սահմանափակ ներուժ ունեն։ Փողոցային բողոքի ցույցերն են մնում ճնշման դասական գործիք, սակայն դրանց հեռանկարները զգալիորեն նվազում են այն փաստով, որ վերջին տարիներին իշխանությունները սովորել են արդյունավետորեն հակազդել զանգվածային բողոքի ցույցերին՝ օգտագործելով ինչպես վարչական, այնպես էլ ուժային մեթոդներ։ Այստեղ համակարգային և ինստիտուցիոնալացված ընդդիմության ստեղծումն է թվում ամենախոստումնալիցը։

Մանրամասները՝ «Փաստ» օրաթերթի այսօրվա համարում

Հարցազրույց
14 Հուլիս, 2026 9:34

«Փաստ» օրաթերթը գրում է.

«Շատ հանգիստ, ուրախ երեխա էր, բոլորի սրտով էր առաջնորդվում։ Բոլորի ուրախությունն էր, իրեն շատ էին սիրում։ Պատանեկության տարիներին էլ իրեն սիրում էին թե՛ մեծերը, թե՛ փոքրերը։ Լրիվ ուրիշ՝ հանգիստ, խելամիտ բնավորություն ուներ»,-«Փաստի» հետ զրույցում ասում է Գրիգորիի մայրիկը՝ տիկին Համեստը։ Գրիգորին ծնունդով Արցախից է՝ Մարտունու շրջանի Բերդաշեն գյուղից։ Սովորել է գյուղի միջնակարգ դպրոցում, այնուհետև՝ Մարտունու արհեստագործական ուսումնարանում։ «Չեմ կարող ասել, որ գերազանց առաջադիմություն է ունեցել, հարվածային էր։ Ընդունակ էր, խելացի, և եթե ավելի շատ ջանք գործադրեր, առաջադիմությունն ավելի լավը կլիներ։ Մաթեմատիկայից ինչ հարց տային, նա առաջինն էր պատասխանում։ Խելացի էր շատ»։

Ուսումնարանն ավարտելուց հետո Գրիգորին մեկնել է ժամկետային ծառայության։ Ծառայել է Հայկազովի զորամասում։ Ծառայության ընթացքում խրախուսվել է պատվոգրերով և կրծքանշաններով։ Զորացրվելուց որոշ ժամանակ հետո 2009 թվականից Գրիգորին անցնում է պայմանագրային զինծառայության Մարտակերտի 5-րդ պաշտպանականում՝ որպես 14-րդ հրաձգային վաշտի ավագ։ «Իրեն այդ ընթացքում ուղարկեցին Երևան՝ ենթասպայական կուրսերի: Երեք տարուց ավելի ենթասպա է եղել, ընդհանուր առմամբ՝ վեց տարի պայմանագրային զինծառայող եղավ։ Նա շատ հանգիստ բնավորություն ուներ, և երբեմն ասում էր՝ չեմ կարող շատ խիստ լինել, ծառայությունն իմ գործը չի։ Հրամկազմն իրենից շատ գոհ էր, ասում էին՝ դուրս մի արի ծառայությունից, բայց նա իր որոշումը չփոխեց»։ Պայմանագրային ծառայությունից դուրս գալուց հետո Գրիգորին արդեն Ստեփանակերտում «Գրանդ Քենդի» ընկերությունում երկու տարի աշխատում է որպես վարորդ։

Գրիգորին մասնակցել է Քառօրյա պատերազմին։ Պարգևատրվել է «Մարտական ծառայություն» մեդալով։ 2017 թվականին նա մեկնում է Ռուսաստանի Դաշնություն, երկու տարի անց վերադառնում տուն՝ Բերդաշեն։ Մայրիկն ասում է՝ չնայած Ռուսաստանում արդեն լավ աշխատանք ուներ, նոր ընկերներ էր ձեռք բերել, բայց չկարողացավ այնտեղ երկար մնալ ու վերադարձավ Արցախ։ Գրիգորին որպես վարորդ էր աշխատում, ապրում էր իր սովորական առօրյայով, շրջագայում։ Հասցրել էր ընկերոջ հետ լինել Արևմտյան Հայաստանում՝ իր հետ Արցախ բերելով Վանա լճի ջրից ու հողից մի մասնիկ։ 2020 թվականի ամռանն ընտանիք է կազմում։ Սպասում էին առաջնեկին, երբ սկսվեց պատերազմը։ «Նա Ստեփանակերտում էր աշխատում։ Առաջին օրն աշխատանքից եկավ տուն, շորերը փոխեց, բոլոր փաստաթղթերը թողեց տանը, ամուսնական մատանին մատից հանեց, դրեց սեղանին և մեր համագյուղացիների հետ կամավոր մեկնեց մարտի դաշտ։ Չսպասեց, որ իրեն ծանուցագիր ուղարկեն. «Ես պատերազմ եմ գնում, չեմ սպասելու, որ ինձ կանչեն։ Իմ հայրենիքն է, իմ հողն է, պետք է պաշտպանեմ»»։

Պատերազմի ընթացքում Գրիգորին համարյա ամեն օր կապ է հաստատել ընտանիքի անդամների հետ։ Եղել է Մարտունու առաջնագծում։ «Երկար չէր կարողանում խոսել, բայց գոնե երկու րոպե զրուցում էինք՝ ես լավ եմ, ամեն ինչ լավ է, ոչ մի բան չի լինի, հանգիստ եղեք»։

Նոյեմբերի 3-ին է եղել Գրիգորիի վերջին զանգը։ Այդ օրը թշնամին սարսափելի գրոհ է ձեռնարկել Մարտունու ուղղությամբ՝ օգտագործելով ռազմական ավիացիա, հրթիռահրետանային միջոցներ։ Մարտունիում նոյեմբերի 3-ին Գրիգորին անմահանում է։ Ընտանիքը բավականին երկար է սպասել ու փնտրել նրան։ «Փետրվարի 16-ին ենք լուրն իմացել։ Այդքան ժամանակ իրեն ամենուր փնտրում էինք, բայց ոչ մի տեղ չկար՝ ո՛չ ողջերի մեջ, ո՛չ զոհվածների։ Հետո արդեն ԴՆԹ հետազոտությամբ հաստատվեց իր ինքնությունը»։

Ամիսներ անց ծնվում է Գրիգորիի որդին։ Ցավոք, հայր ու որդի այդպես էլ չեն հանդիպում։ «Զրույցների ժամանակ կնոջը միշտ ասում էր՝ Անյա, քեզ լավ կնայես, նույնն էլ մեզ էր հորդորում, որ անենք»։

Հիմա Գրիգորին հայրենի Բերդաշենում է։ «Իմ ամենամեծ կարոտն է, ամենամեծ դժվարությունը, որ ունենք, չենք կարողանում մեր տղային այցի գնալ, մի ծաղիկ տանել նրան։ Գուցե եթե մեր հողում լինեինք, կարողանայինք իր մոտ հաճախակի գնալ, այսքան ծանր չլիներ։ Իսկ հիմա ուղղակի ահավոր է այս վիճակը։ Ես իր բոլոր մեդալները, իրերը, այն, ինչ հնարավոր էր, ինձ հետ բերեցի՝ որպես փոքրիկ հուշ իմ որդուց»։

Ապրելու ուժի մասին։ «Երկու որդի ունեմ՝ Գրիգորին ու Գևորգը։ Պատերազմի ժամանակ չիր ու չամիչ չեն բաժանում, ինչպես ժողովուրդն է ասում։ Միայն իմ որդին չէր, որ զոհվեց այս պատերազմում։ Որդու կորստի ցավն անտանելի է, թող ոչ մի ծնող այս ցավը չզգա։ Ես տարբերություն չեմ դնում մեր բոլորիս որդիների միջև, որոնք զոհվեցին։ Ե՛վ մեր որդիները զոհվեցին, և՛ մենք մեր հողից դուրս եկանք։ Հայաստանն էլ է մեր հայրենիքը, բայց ծննդավայրն ուրիշ է։ Ես հիմա չեմ կարողանում իմ որդու գերեզմանին այցի գնալ։ Իմ ընտանիքը, երեխաներս, իմ Գրիգորիի որդին են ուժ տալիս, մի քիչ սփոփում այս ցավը։ Նայում եմ թոռնիկիս՝ հոր աչքերն ունի, ամեն ինչով շատ նման է տղայիս։ Գրիգորիիս կինն էլ արդեն հարս չի, աղջիկ է ինձ համար, իր մասին էլ եմ շատ մտածում։ Հիմա միակ ցանկությունս խաղաղությունն է, թող ոչ ոք չապրի այն, ինչի միջով մենք անցանք։ Ամեն օր Աստծուն աղոթում եմ խաղաղության համար, որ մեր բոլոր երեխաները խաղաղ երկնքի տակ ապրեն։ Ես անգամ թշնամուս այս ցավը չեմ ցանկանա»։

Հ. Գ. – Գրիգորի Գաբրիել յանը ծառայության ընթացքում պարգևատրվել է «ՀՀ զինված ուժեր 20 տարի» հոբել յանական մեդալով։ Հետմահու պարգևատրվել է «Մարտական խաչ» 2-րդ աստիճանի շքանշանով։ Հուղարկավորված է Արցախում՝ հայրենի Բերդաշենում։

Մանրամասները՝ «Փաստ» օրաթերթի այսօրվա համարում