ՀՀ Սյունիքի մարզի Սիսիան համայնքի Շաքի բնակավայրում ադրբեջանցի զինծառայողի կրակոցից տուժած հայ կինը՝ Անի Ավետիսյանը, ոտքը չի կարողանում շարժել, նրան դեռ ևս մեկ վիրահատություն է սպասվում: Այս մասին Sputnik Արմենիայի հետ զրույցում ասաց Անիի քույրը՝ Արփի Ավետիսյանը:
Նշենք, որ Անին այժմ բուժում է ստանում Երևանի «Սուրբ Գրիգոր Լուսավորիչ» ԲԿ-ում: Հոկտեմբերի 10-ին համացանցում բժիշկ Անդրանիկ Ղազարյանը ադրբեջանցի զինծառայողի կրակոցից վիրավորում ստացած Անի Ավետիսյանի և նրա որդու հիվանդանոցային լուսանկարն է հրապարակել:
«Ոտքը երկաթով ֆիքսած է, պետք է կրկին վիրահատություն լինի, բայց դա երևի 1 ամսից: Քույրս դեռ չի տեղաշարժվում, անընդհատ ցավեր է ունենում, բժիշկները ցավազրկողներ են ներարկում: Այդ ոտքն ընդհանրապես չի կարողանում շարժել»,- նշեց Արփին:
Քույրը հայտնեց, որ Անիի կրտսեր որդու ձեռքի կոտրված մատների հատվածում երկաթներ էին դրել, բայց դրանք հանել են ու գիպս դրել:
Արփին ընդգծեց, որ քրոջ երեխաներն այժմ Երևանում են, իրենց տատիկի և պապիկի տանը, ամեն օր իրենց մորը տեսակցում են հիվանդանոցում:
Արփին նաև նշեց, որ Անին հուզական ծանր վիճակում է:
Հիշեցնենք` հոկտեմբերի 1-ին հայտնի դարձավ, որ Սյունիքի մարզի Սիսիան համայնքի Շաքի բնակավայր ադրբեջանցի զինծառայող է ներթափանցել, գիշերել տներից մեկում, ապա կրակել տուն մտած 39-ամյա Անի Ավետիսյանի ոտքին։ Վիրավոր կինը հասցրել է դանակով հարվածել ադրբեջանցուն՝ Նասիմի Մուսաևին։ Վնասվածքներ է ստացել նաև Ավետիսյանի երեք երեխաներից 15-ամյա որդին, որը տեղափոխվել է Սիսիանի ԲԿ։ Անի Ավետիսյանն այժմ Երևանի «Սուրբ Գրիգոր Լուսավորիչ» ԲԿ–ում է։
Մուսաևի նկատմամբ քրեական հետապնդում է հարուցվել 5 հոդվածի հատկանիշներով, և երկամսյա կալանք է կիրառվել։
Leave a Reply