Գրադարանային համակարգի սիրելի՛ աշխատակիցներ, գրադարանային գործի հարգելի՛ մասնագետներ, ընդունեք իմ ջերմագին շնորհավորանքները ձեր մասնագիտական տոնի՝ Գրադարանավարի օրվա կապակցությամբ։
Օրը հիանալի առիթ է ևս մեկ անգամ կարևորելու գրադարանավարի մասնագիտությունը և բացառիկ դերը կրթական միջավայրի ձևավորման և գիտելիքի տարածման գործում:
Ժամանակակից գրադարաններն այսօր այլևս դուրս են եկել պարզապես գրապահոց լինելու շրջանակից՝ վերածվելով կրթամշակութային օջախների, ինչպես նաև համայնքային կյանքի կազմակերպման և բովանդակալից ժամանցի ապահովման հարթակների։
Այս համատեքստում առավել է արժևորվում Ձեր՝ գրադարանավարներիդ առաքելությունը։ Դուք եք ձևավորում և ամրապնդում ընթերցող-գրադարան կապը, բացահայտում և խթանում բարձրաճաշակ գրականության նկատմամբ հետաքրքրությունը, առաջնորդում և ուղղորդում ընթերցողին գիտելիքի անծայրածիր աշխարհում՝ դրանով իսկ կարևորագույն ներդրում ունենալով կրթված, բազմակողմանի զարգացած և մշակութային բարձր արժեքներ կրող հասարակության ձևավորման գործընթացում։
Լիահույս եմ, որ շարունակելու եք նույն ոգևորվածությամբ, հոգատարությամբ և պատասխանատվությամբ վերաբերվել ձեր աշխատանքին և Ձեր մասնագիտական գործունեությամբ նպաստել համայնքի հոգևոր-մշակութային կյանքի աշխուժացմանն ու զարգացմանը։
Առողջություն, բարեկեցություն և ամենայն բարիք եմ մաղթում Ձեզ, սիրելի՛ գրադարանավարներ։
Leave a Reply