Կապանի արվեստի թանգարանում հոկտեմբերի 1-ին բացվեց «Ֆրանսահայ գրաֆիկայի մեծագույն վարպետները» խորագրով ցուցահանդեսը։ Նախաձեռնությունը Երևանի ժամանակակից արվեստի թանգարանինն էր։
«Երևանը մարզերում» ծրագիրն իրականացվում է Երևանի քաղաքապետարանի աջակցությամբ։
Ցուցադրության մեջ ներկայացված էին ֆրանսահայ անվանի արվեստագետներ Գառզուի (Գառնիկ Զուլումյան) և Ժանսեմի (Հովհաննես Սեմերջյան) մոտ 50 գրաֆիկական աշխատանքներ։ Ցուցադրությունն ուղեկցվեց ֆրանսահայ երգահանների և կոմպոզիտորների՝ Շառլ Ազնավուրի, Միշել Լեգրանի, Ժորժ Գարվարենցի և այլոց ստեղծագործություններով։
Ցուցահանդեսի շրջանակում Կապանի մանկապատանեկան ստեղծագործության կենտրոնում արվեստագետ–նկարիչ Լուսինե Նաղդալյանն անցկացրեց «Մենատիպ և խառը տեխնիկա․ ստեղծագործենք միասին» խորագրով աշխատարաններ։
Սփյուռքահայ երկու ականավոր արվեստագետի ստեղծագործություններին հնարավոր կլինի հաղորդակից լինել մինչև հոկտեմբերի 14-ը։
«Ծրագրի առաջին փուլն իրականացվել է Գյումրիում և Վանաձորում, և նկատեցինք, որ նման ցուցահանդեսների նկատմամբ հետաքրքրությունը մեծ է։ Ուստի որոշեցինք այս տարի ևս ծրագիրն իրականացնել մարզերում և հուսով ենք, որ այն կլինի շարունակական՝ այլ գործերով ու ստեղծագործություններով», – «Սյունյաց երկրին» փոխանցեց Երևանի ժամանակակից արվեստի թանգարանի տնօրեն Նունե Ավետիսյանը։
Վահրամ Օրբելյան
Leave a Reply