Blog

«Ժողովուրդ» օրաթերթը գրում է. ««Ժողովուրդ»-ը երեկ գրել էր, որ Սյունիքի մարզի Ծավ բնակավայրի խմելու ջրում սնդիկի հայտնաբերման խայտառակ պատմությունը հասել է արդեն վարչապետ Նիկոլ Փաշինյանին։

«Ժողովուրդ» օրաթերթի տեղեկություններով՝ տարբեր պետական կառույցների ներկայացուցիչներից պարզաբանումներ են պահանջվում գործադիրի կողմից, իրականացվում են փորձաքննություններ և ուսումնասիրություններ՝ պարզելու, թե ինչպես է սնդիկը հայտնվել բնակիչների օգտագործած ջրում և ովքեր են պատասխանատու։

Բայց գլխավոր հարցը մնում է անպատասխան՝ իսկ մինչ այդ ո՞վ էր վերահսկում և ինչպե՞ս բնակիչը բացահայտեց, որ իր տան ծորակից հոսող ջրում առկա է սնդիկ։

Պաշտոնական տվյալներով էլ՝ Ծավի բնակչի ահազանգից հետո Հիվանդությունների վերահսկման և կանխարգելման ազգային կենտրոնի մասնագետները ջրի նմուշ են վերցրել, և լաբորատոր հետազոտությամբ արձանագրվել է սնդիկի թույլատրելի շեմի գերազանցում։ Կրկնակի նմուշառում է կատարվել չորս կետից, և սեպտեմբերի 11-ին ստացված արդյունքներով նույն շեղումը կրկին հաստատվել է։

Այսինքն՝ վտանգը հայտնաբերել է ոչ թե պետական վերահսկողության համակարգը, այլ բնակիչը՝ ջրում մետաղական զանգված նկատելուց հետո։ Միայն ահազանգից, ուշացած նմուշառումներից և արդյունքների հաստատումից հետո հանրությանը զգուշացվել է, որ Ծավի ծորակի ջուրը չպետք է օգտագործել։

Հետևաբար՝ ո՞վ է պատասխանատու, որ վտանգը ժամանակին չի հայտնաբերվել։

Եթե ՀՎԿԱԿ-ը իրականացնում է նմուշառում և լաբորատոր վերահսկողություն, ապա ո՞վ պետք է ապահովեր, որ նման ահազանգից հետո պետական ամբողջ համակարգն անհապաղ գործեր։

Մինչ օրս անպատիժ է Առողջապահության նախարար Անահիտ Ավանեսյանը, ով հանրության առողջության թիվ մեկ պատասխանատուն է։

Եթե Առողջապահության նախարարության համակարգում հանրային առողջության և ՀՎԿԱԿ-ի աշխատանքների համակարգումը վերապահված է փոխնախարար Լենա Նանուշյանին, ինչո՞ւ մինչ օրս նրա պատասխանատվության հարցը չի բարձրացվել։ Անհասկանալի է։

Նույն հարցն ուղղվում է Առողջապահական և աշխատանքի տեսչական մարմնի ղեկավար, պետբյուջեից միլիոններ ստացող Սլավիկ Սարգսյանին․ եթե կառույցը վերահսկողական գործառույթներ ունի առողջապահության ոլորտում, ինչո՞ւ ահազանգից մինչև բնակչությանը պաշտոնապես զգուշացնելը տեսչության առավել ակտիվ և տեսանելի գործողություններ չեն եղել։

Եվ վերջապես՝ ինչո՞ւ մինչ օրս ՀՎԿԱԿ-ի ղեկավար Ստեփան Աթոյանը պատասխանատվության չի ենթարկվել։ Նա ստանում է միլիոնների աշխատավարձ ու պարգևավճար։

Բայց պետության պարտականությունը միայն «ջուրը մի խմեք» ասելը չէ։ Այն պետք է պատասխանի՝ ինչո՞ւ ջուրը վտանգավոր դարձավ, ինչո՞ւ վտանգը ժամանակին չհայտնաբերվեց, ո՞վ պետք է կանխեր դա և ո՞վ է պատասխան տալու։

Առավել ևս, որ սա ջրի անվտանգության շուրջ առաջին մտահոգիչ դեպքը չէ․ Բյուրեղավանի դեպքից հետո ևս բազմաթիվ հարցեր մնացին անպատասխան։

Եվ կրկին նույն պատկերն է՝ ուսումնասիրություններ, նմուշառումներ, պարզաբանումներ, զեկույց վարչապետին, իսկ համակարգի պատասխանատուները շարունակում են պաշտոնավարել՝ ասես ոչինչ չի եղել։

Նիկոլ Փաշինյանից հիմա պետք է ակնկալել ոչ միայն պատճառները պարզելու հանձնարարական, այլև պատասխան պաշտոնյաների անգործության պատիժների մասով։ Ի վերջո, սա ազգային անվտանգության հարց է»։

Մանրամասները՝ «Ժողովուրդ» օրաթերթի այսօրվա համարում։

«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ երեկ՝ սեպտեմբերի 15-ին, նախատեսված ՔՊ վարչության նիստի օրակարգում, թեև ի սկզբանե Սյունիքի մարզի՝ Կապան, Մեղրի և Գորիս համայնքների ՏԻՄ ընտրություններում իշխանական թեկնածուների հարցն էր, բայց իրավիճակ է փոխվել։

«Ժողովուրդ» օրաթերթի իշխանական աղբյուրների փոխանցմամբ՝ օրվա երկրորդ կեսին պարզ է դարձել, որ վարչապետ Նիկոլ Փաշինյանը չի կարող մասնակցել ՔՊ վարչության նիստին։ Արդյունքում որոշվել է նիստը անցկացնել ՔՊ վարչության փոխնախագահ Գևորգ Պապոյանի գլխավորությամբ։

Քանի որ Սյունիքի երեք խոշոր համայնքների թեկնածուների հարցը, ըստ մեր տեղեկությունների, ենթադրում էր Նիկոլ Փաշինյանի անձնական մասնակցություն և վերջնական քննարկում, այդ հարցերը նիստի օրակարգից դուրս են մնացել։

Փոխարենը, «Ժողովուրդ» օրաթերթի տեղեկություններով, ՔՊ վարչությունում քննարկման հիմնական թեմաներից մեկը դարձել է ՔՊ-ական Հայկ Սարգսյանի վարքագիծը և նրա վերջին հարցազրույցում հնչեցրած հայտարարությունները։

Մեր աղբյուրների փոխանցմամբ՝ վարչությունում քննարկվել են Սարգսյանի կողմից նախկին թիմակիցների, այդ թվում՝ Ազգային ժողովի նախկին նախագահ Ալեն Սիմոնյանի հասցեին հնչեցրած քննադատություններն ու մեղադրանքները, ինչպես նաև ՔՊ-ական այլ պատգամավորների, պաշտոնյաների վերաբերյալ նրա հայտարարությունները։

Սա ուշագրավ է հատկապես այն հանգամանքը, որ Հայկ Սարգսյանի նկատմամբ ՔՊ վարչությունն արդեն մեկ անգամ կարգապահական պատասխանատվություն է կիրառել։ 2025 թվականին Ալեն Սիմոնյանի դիմումի հիման վրա Սարգսյանի նկատմամբ կարգապահական վարույթ էր հարուցվել, որի արդյունքում նրան հայտարարվել էր խիստ նկատողություն։

Ավելին՝ 2026 թվականի հունվարին Նիկոլ Փաշինյանը հրապարակային հայտարարեց, որ Սարգսյանին ՔՊ վարչությունում ամիսներ առաջ խիստ նկատողություն էր հայտարարվել, և դրան հաջորդել էին իրավական գործընթացներ։

Հիմա, մեր տեղեկություններով, ՔՊ վարչությունում քննարկվել է՝ արդյոք Սարգսյանի վերջին հրապարակային հայտարարությունները հիմք են նոր կարգապահական վարույթ սկսելու և նրան կրկին նկատողություն հայտարարելու համար։

Վարչության անդամների շրջանում այս հարցում միասնական մոտեցում չկա։ Մի մասը կարծում է, որ պետք է Սարգսյանի նկատմամբ նոր կարգապահական նոր վարույթ հարուցել և հերթական նկատողությունը կիրառել։ Մյուսները, հաշվի առնելով նախկինում արդեն կիրառված խիստ նկատողությունը, հարցը շատ ավելի կոշտ են դնում՝ նշելով, որ հերթական նկատողությունը կարող է այլևս բավարար միջոց չլինել, և պետք է քննարկել Հայկ Սարգսյանին կուսակցությունից հեռացնելու հարցը։

Սակայն, ըստ «Ժողովուրդ» օրաթերթի իշխանական աղբյուրների, այս պահին Հայկ Սարգսյանի վերաբերյալ վերջնական որոշում չի կայացվել։

Չի բացառվում, որ հարցը կրկին կքննարկվի արդեն Նիկոլ Փաշինյանի մասնակցությամբ ՔՊ վարչության նիստում, և հենց այդ ժամանակ էլ պարզ կդառնա՝ Հայկ Սարգսյանին սպասվում է հերթական կարգապահական պատիժ, թե ՔՊ-ն ավելի կոշտ քայլ կանի՝ նրան կուսակցությունից հեռացնելու ճանապարհով»։

Մանրամասները՝ «Ժողովուրդ» օրաթերթի այսօրվա համարում։