Ճիշտ է, ծիրանի բերքն այս տարի էականորեն քիչ է եղել, բայց եթե նախորդ տարի միջինում 200 դրամով է ծիրանը վաճառվել, այս տարի վաճառվել է 400-600 դրամով: Սա էլ է գործոն, որը, կարծում եմ՝ պետք է հաշվի առնել: Այս մասին Կառավարության՝ հուլիսի 9-ի նիստին ասաց վարչապետ Նիկոլ Փաշինյանը:
«Մյուս կողմից՝ փորձն ի՞նչ է ցույց տալիս. որ ծիրանի բերքատվությունը ցիկլիկ է, այսինքն՝ լինում են գերբերքատվության և ցածր բերքատվության տարիներ: Հիմա մեր խնդիրն այն է, որ մենք ժամանակ ունենք առաջիկա 1 տարվա ընթացքում պատրաստվել այն իրավիճակին, որ ծիրանի և մյուս գյուղմթեքի արտահանումները մաքսիմալ դիվերսիֆիկացնենք, որպեսզի որևէ մեկ շուկայից անհամաչափ կախվածություն չունենանք՝ ի կատարումն իրական Հայաստանի գաղափարախոսության այն թեզի, որ անկախությունը քչերից կախվածությունը փոխարինելն է շատերից կախվածությամբ: Այսինքն՝ եթե մենք տասնյակ շուկաներ որևէ բան արտահանում ենք, այդ շուկաներից որևէ մեկում մեզ համար չկանխատեսված իրադարձությունը չի կարող մեր շուկայի վրա ազդել:
Եվ ընդհանրապես, բոլոր ապրանքնատեսակների և ամեն ինչի պարագայում մենք պետք է գործենք այս տրամաբանությամբ, և սա Հայաստանի ինքնիշխանության, անկախության և պետականության ամրապնդման ճանապարհն է»,- ասաց նա:
Էկոնոմիկայի նախարար Գևորգ Պապոյանն այս համատեքստում ներկայացրեց ապրանքների դիֆերսիֆիկացման պատկերը՝ նշելով, որ հունիս-հուլիս ամիսների ընթացքում միրգ է արտահանվել աշխարհի 15 երկիր, ծաղիկ՝ 25 երկիր, բանջարեղեն՝ 8 երկիր: