Category: Hayelia.am

«Ժողովուրդ» օրաթերթը գրում է. «Երեկ Ազգային ժողովում «Ժողովուրդ» օրաթերթը ուշագրավ հանդիպում արձանագրեց․ խորհրդարանի նախագահն ու ԱԺ-ում ներկայացված երեք խմբակցությունների ղեկավարները միասին զրուցում էին կարմիր ֆոյեում։ «Ժողովուրդ» օրաթերթը խորհրդարանի ամենամեծ՝ «Քաղաքացիական պայմանագիր» խմբակցության ղեկավար Արուսյակ Մանավազյանից հետաքրքրվեց, թե ինչ հարց էին քննարկել նման կազմով։ Մանավազյանը մեզ հետ զրույցում ասաց, որ առանձնահատուկ կամ փակ քննարկում չէ։

Ըստ նրա՝ զրույցի թեման «Հայաստան» խմբակցության ղեկավար Աննա Գրիգորյանի՝ ԱԺ դահլիճում արված առաջարկն էր՝ հնարավորինս արագ ավարտել ԱԺ մշտական հանձնաժողովների նախագահների ընտրության գործընթացը։ Բանն այն է, որ խորհրդարանն ունի 12 մշտական հանձնաժողով, և եթե յուրաքանչյուր հանձնաժողովի նախագահի թեկնածության քննարկումն ու քվեարկությունը կազմակերպվեն ներկայիս տեմպով, գործընթացը կարող է բավական երկար տևել և մինչև սեպտեմբեր դժվար թե ավարտվի։

«Մենք համաձայն ենք, որ գործընթացը պետք է արագ ավարտել, սակայն ես պնդեցի, որ 12 հանձնաժողովների նախագահների թեկնածությունների քննարկումներն ավարտենք և բոլորի քվեարկությունն անցկացնենք նույն օրը, որպեսզի խորհրդարանն ամբողջությամբ ձևավորված լինի և պատրաստվենք կառավարության ծրագրի ներկայացմանը»,— «Ժողովուրդ» օրաթերթին փոխանցեց Արուսյակ Մանավազյանը։

Այսպիսով, ԱԺ նախագահի և երեք խմբակցությունների ղեկավարների՝ միջանցքում արձանագրված հանդիպման առանցքում խորհրդարանի վերջնական ձևավորման և մշտական հանձնաժողովների նախագահների ընտրության գործընթացն արագ ավարտելու հարցն էր»։

Կառավարության այօրվա նիստի չզեկուցվող հարցերի փաթեթով կվերանշանակվեն՝ Ռոբերտ Ղուկասյանը Սյունիքի մարզպետի պաշտունում, Վահագն Արսենյանը Վայոց ձորի մարզպետի պաշտոնում, Սեդրակ Թևոնյանը Արարատի մարզպետի պաշտոնում, Սերգեյ Մովսիսյանը Արագածոտնի մարզպետի պաշտոնում, Վահրամ Խաչատրյանը Արմավիրի մարզպետի պաշտոնում, Հայկ Ղալումյանը Տավուշի մարզպետի պաշտոնում, Կարեն Սարգսյանը Գեղարքունիքի մարզպետի պաշտոնում, Դավիթ Առուշանյան Շիրակի մարզպետի պաշտոնում, Արեն Մկրտչյանը Լոռու մարզպետի պաշտոնում։

24news.am

Ամերիկյան Թենեսի, Ալաբամա և Օկլահոմա նահանգները հինգշաբթի նախատեսում են մահապատժի ենթարկել երեք բանտարկյալի, ինչը, եթե իրականացվի, ԱՄՆ-ում գրեթե 16 տարվա ընթացքում առաջին դեպքը կլինի, երբ նույն օրը երեք մարդ մահապատժի է ենթարկվում։ «Արմենպրես»-ի փոխանցմամբ, այս մասին հայտնում է Associated Press լրատվական գործակալությունը։

Ալաբամայում մահացու ներարկման միջոցով պլանավորվում է մահապատժի ենթարկել Ջերեմի Ուիլյամսին, որը դատապարտվել է 2021 թվականին հինգ տարեկան աղջկա բռնաբարության ու սպանության համար։

Օկլահոմայում մահապատժի պետք է ենթարկվի Կառլոս Կուեստա-Ռոդրիգեսը՝ 2003 թ. իր քաղաքացիական կնոջը սպանելու համար։

Թենեսիում մահապատժի կենթարկվի Էնթոնի Հայնսը, որը դատապարտվել է 1985 թվականին չորս երեխաների մորն սպանելու համար։

Death Penalty Information Center-ի տվյալների համաձայն՝ վերջին անգամ ԱՄՆ-ի երեք նահանգներ նույն օրը մահապատիժներ են իրականացրել 2010 թվականին։

ՆԱՏՕ-ն սկսել է կրճատել իր զորքերի քանակը Կոսովոյում՝ անվտանգության իրավիճակի բարելավման պատճառով: Այս մասին, ինչպես հաղորդում է «Արմենպրես»-ը, գրել է Դաշինքի խոսնակ Ալիսոն Հարթը X հարթակում։

«Մենք սկսել ենք ճշգրտել մեր ռազմական ներկայությունը՝ բոլոր համապատասխան գործիչների և կողմերի հետ սերտ խորհրդակցություններով», – նշել է նա։

Հարթը բացատրել է, որ տարածաշրջանում ՆԱՏՕ-ի ուժերի կրճատումը պետք է հարմարվի ներկայիս անվտանգության միջավայրին, որը, ըստ նրա, զգալիորեն բարելավվել է։

Նա հավելել է, որ այս գործընթացը շրջելի է, և ՆԱՏՕ-ի ներկայությունը տարածաշրջանում կարող է կրկին ընդլայնվել ցանկացած պահի, եթե դաշինքը անհրաժեշտ համարի։

«Ժողովուրդ» օրաթերթը գրում է. «Ծաղկաձորում և Հայաստանի տարբեր բնակավայրերում Գագիկ Ծառուկյանին առնչվող քրեական վարույթի շրջանակում գործող օբյեկտներ են կապարակնքվել, տնտեսվարողների գործունեությունը կանգնել է, բայց թե քանի բիզնես է փակվել, քանի աշխատող է մնացել առանց աշխատանքի և ինչ ժամկետով է սահմանափակումը՝ Քննչական կոմիտեն չի ասում։ «Ժողովուրդ»-ի հարցերին ՔԿ-ն պատասխանել է՝ նախաքննության տվյալ է։

ՀՀ քննչական կոմիտեն, ի պատասխան «Ժողովուրդ»-ի հարցումների, հաստատել է, որ 2026 թվականի հուլիսի 6-ին մի շարք տնտեսվարողների գործունեության հասցեներում խուզարկություններ են իրականացվել, ինչի ընթացքում վերցվել են տարբեր իրեր և առարկաներ, իսկ այդ հասցեները «կապարակնքվել են»՝ ապացուցողական և վարութային գործողություններ իրականացնելու նպատակով։ Սակայն հենց այստեղ էլ սկսվում է տեղեկատվական փակուղին։ «Ժողովուրդ»-ը ՔԿ-ին հարցրել էր՝ ընդհանուր քանի օբյեկտ է կապարակնքվել, դրանցից քանիսն են հյուրանոցներ, քոթեջներ, ռեստորաններ, զբոսաշրջային և այլ տնտեսական նշանակության օբյեկտներ, քանի տնտեսվարողի գործունեություն է սահմանափակվել, քանի աշխատողի վրա է դա ազդել և որքան կարող է տևել փակումը։ Պատասխանը՝ ոչ մի թիվ։ ՔԿ-ն հայտնում է, որ օբյեկտների ապակապարակնքման հարցը կքննարկվի «համապատասխան քննչական և ապացուցողական գործողությունների ավարտից հետո»։

Այսինքն՝ բիզնեսը կարող է փակ մնալ, բայց դրա բացման ժամկետը հայտնի չէ. երբ քննիչը կավարտի քննությունը։ Առավել ուշագրավ է, որ ՔԿ-ն մեր մյուս հարցերի վերաբերյալ ուղղակիորեն հայտարարել է․ «Տեղեկատվություն տրամադրել հնարավոր չէ, քանի որ պարունակում են հրապարակման ոչ ենթակա նախնական քննության տվյալներ»։ Սակայն հարցն այստեղ այն է, թե ինչպե՞ս է, օրինակ, կապարակնքված օբյեկտների ընդհանուր թիվը կամ դրանց տնտեսական նշանակությունը դառնում նախաքննության գաղտնիք։ Մենք ՔԿ-ից չենք պահանջել բացահայտել քրեական վարույթի գաղտնի ապացույցները, խուզարկության մանրամասները կամ քննության տակտիկան։ Հարցրել ենք հանրային նշանակություն ունեցող հետևանքների մասին՝ քանի բիզնես է փակվել, քանի աշխատատեղ է սահմանափակվել և ինչ վիճակում են գտնվում տնտեսվարողները։ Հատկապես խնդրահարույց է տուրիստական Ծաղկաձորի հարցը։ ArmLur.am-ի նկարահանող խումբը ճոպանուղու հարակից տարածքում արձանագրել էր փակ և կապարակնքված շինություններ, այդ թվում՝ քոթեջներ ու հանգստի և սպասարկման օբյեկտներ։

Իսկ Ծաղկաձորը Հայաստանի զբոսաշրջային գլխավոր ուղղություններից է։ Հարցման մեջ հատուկ հետաքրքրվել էինք՝ արդյոք քննարկվել է ավելի մեղմ սահմանափակում կիրառելու հնարավորությունը՝ այն դեպքում, երբ օբյեկտի ամբողջական փակումը քննության համար պարտադիր չէ։ Այս հարցին ևս պատասխան ուղղակի չկա։

Ստացվում է հետաքրքիր իրավիճակ․ Քննչական կոմիտեն վարչապետի ուղիղ կամ անուղղակի հրահանգով կարող է սահմանափակել տնտեսվարողի գործունեությունը, բայց հասարակությունը չի կարող իմանալ սահմանափակման մասշտաբը։ Ու այդպես էլ պաշտոնապես հայտնի չէ՝ խոշոր գործարար Գագիկ Ծառուկյանին պատկանող քանի՞ բիզնես է այսօր փակված, քանի՞ մարդ չի կարողանում աշխատել և ե՞րբ են այդ մարդկանց թույլ տալու վերադառնալ իրենց աշխատանքին։ ՔԿ-ն ասում է՝ ավարտենք, կասենք։ Երբ կավարտեն՝ պարզ չէ։

Իսկ այդ ընթացքում հարյուրավոր մարդկանց իրավունքներ են ոտնահարվում»։

«Հրապարակ» օրաթերթը գրում է. Երգիչ Հայկ Ստվերը, որը 2018-ին կատարում էր հեղափոխության խորհրդանիշ դարձած «Իմ քայլը» երգը, չի կարողանում աշխատանք գտնել։ «Հեղափոխությունից հետո ինձ համար աշխատանք գտնելը մեծ խնդիր է դարձել, որտեղ գնում եմ, որ աշխատանքի ընդունվեմ, մերժում են, քանի որ այդ ակումբների մեծ մասը քաղաքական որեւէ ուժի ներկայացուցիչներից մեկին է պատկանում»։

Հարցին՝ այդ հարցով չի՞ փորձել Նիկոլ Փաշինյանին դիմել, նա պատասխանեց․ «Մի անգամ ասել եմ նենց թեթեւ, բայց էնպես չեմ ասել, որ օգնության կարիք ունեմ, ուղղակի ասել եմ, որ աշխատանք չեմ գտնում։ Ես ինձ անհարմար կզգայի, որ աշխատանք գտնելու հարցում օգնություն խնդրեի»։

Անդրադառնալով «Վարչաբենդ» խմբին, որտեղ ինքը, որպես հրավիրված անդամ, մեկ երգ է երգում, նշեց, որ խումբն այս շրջանում պասիվ է․ «Որքան ժամանակ է՝ խմբից տեղեկություն չունեմ, ընտրություններից հետո ոչ մի անգամ չենք հավաքվել, փորձեր չենք անում, երեւի «Վարչաֆեսթ 2026»-ին էլ չենք մասնակցի, այլապես այս փուլում ակտիվ փորձեր կանեինք»։

Նշենք, որ Հայկ Ստվերը բարձրտեխնոլոգիական արդյունաբերության արդեն նախկին նախարար Մխիթար Հայրապետյանի եղբայրն է։

Չինաստանը սպառնում է ԱՄՆ-ին՝ Ռուսաստանի դեմ պատժամիջոցների պատճառով: Վաշինգտոնում Չինաստանի դեսպանատնից հայտարարել են, որ երկիրը անհրաժեշտ միջոցներ կձեռնարկի իր ընկերություններին և քաղաքացիներին պաշտպանելու համար, եթե ընդունվի ռուսական էներգակիրների գնորդների նկատմամբ մաքսատուրքեր սահմանող օրենք։

Պաշտոնական Պեկինը ընդգծել է, որ չինական բիզնեսին վերաբերող ցանկացած սահմանափակում անպատասխան չի մնա։

Իսրայելական ուժերը պայթեցրել են Հորդանան գետի Արևմտյան ափի Թել գյուղում պաղեստինցի Ֆարուք Ռամադանի ընտանիքին պատկանող տունը։

Պայթեցումից առաջ իսրայելական զինվորականները մի քանի ժամ ականապատել են շենքը, իսկ հարակից տների բնակիչներին ստիպել են լքել իրենց բնակարանները։

Ֆարուք Ռամադանը 2026 թվականի հուլիսի 24-ին սպանվել էր իսրայելցի զինծառայողի կողմից՝ ընտանիքի ևս երեք անդամների հետ միասին, երբ զինված իսրայելցի բնակիչները հարձակվել էին գյուղի վրա։

Փաստաբան Րաֆֆի Ասլանյանը ֆեյսբուքյան իր էջում գրել է․ «Ընդամենը երեք ամիս առաջ ասֆալտապատված Իսակովի պողոտան այս պահին գերակշիռ մասով վնասված ու անհարթ լինելու պատճառով արդեն իսկ երթևեկության համար դառնում է վտանգավոր։

Հանուն մակրոնների այցի՝ բավարար որակի ճանապարհածածկը հեռացված և իրականում ընդամենը «սևացված» Իսակովի պողոտան պետք է կրկին ողջ ծավալով և պատշաճ որակով ասֆալտապատվի՝ շինարարի միջոցների հաշվին, իսկ տեղի ունեցածը պետք է ունենա քրեաիրավական հետևանքներ, այդ թվում՝ աշխատանքը կազմակերպած և ընդունած պաշտոնյաների կողմից «ատկատների» վերադարձի իմաստով։ Իհարկե, ինչպես միշտ, ամեն ինչ որոշվելու է՝ կախված նրանից, թե կոռուպցիոն շղթան մինչև որտեղ և ում է հասել»: